Ihwatsha umdlalo otshisayo iMBC

22 Jun, 2017 - 02:06 0 Views
Ihwatsha umdlalo otshisayo iMBC BMC Productions

uMthunywa

Cornelius Luphahla
INKAMPANI yeMaestro Best Creation Production (MBC) isiyethule umdlalo ohlabusayo ofundisa izithandani ngokuphilisana emakhaya ngenhloso yokuqinisa imizi.

Inkampani le esesigabeni seSilalatshani eFilabusi ipheke umdlalo olesihloko esithi, Kubuhlungu ukuthanda umuntu, kuyonale inyanga ngenjongo yokufundisa ngezothando lokuqinisa imizi.

UKwanele Ncube uthe sebeleminyaka embalwa basungula inkampani le njalo bapheka imidlalo, izingoma kanye lokufundisa ngezokujabulisa uzulu.

Uthe umdlalo wabo ufundisa ngokuphathana kuhle kwabathatheneyo kanye lokuphila ngokuthula.

“Inhlanganiso yethu sayisungula ngo-2010 ngenhloso yokuthokozisa uzulu ngezemidlalo, ezomculo kanye lokufundisa ngezokujabulisa uzulu. Ekuyisunguleni kwethu sasibathathu: mina, uLancelot Moyo kanye loThembeni Mpofu, noma nje khathesi sesisebenza sibanengi njengoba umdlalo uphekwa ngabantu abanengi.

“Ngalokhu umdlalo wethu lo esiwuphekileyo ufundisa ngokuphathana kuhle kwabantu abathatheneyo kanye lokuphila ngokuthula emizini. Ngalokhu sikhuthaza abathetheneyo ukuthi baphile ngokuthula emizini yabo,” kutsho uKwanele Ncube.

Ekhuluma lentatheli uLancelot Moyo uthe njengenhlanganiso ekhangela ngezokuthokozisa uzulu bayafundisa abaculi babuye babaphathise kwezomculo.

“Thina njengenhlanganiso okwakhathesi sikweleSouth Africa ngokomsebenzi kodwa siphathisa kakhulu abaculi bakithi koMthwakazi ngoba badinga ukuthuthukiswa. Okunye njalo sizavakatshela kwelakithi sijabulise uzulu ngomdlalo wethu kanye langengoma,” kutsho uMoyo.

Ekhuluma lentatheli uThembeni Mpofu uthe ukhuthaza uzulu ukuthi awusekele umdlalo lo ukuze athole izifundo ezinengi empilweni.

“Ngikhuthaza uzulu ukuthi awubukele umdlalo lo ukuze athole izifundo ezehlukeneyo mayelana lempilo ngoba uyafundisa kakhulu. Abatsha ubakhuthaza ukuthi baziphathe ngendlela eqondileyo bengatshaphazi imizimba yabo,” kutsho uMpofu.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds