uMthunywa
KULELI viki sizananzelela umcebo wamaNdebele, inotho yeSintwini eyiyo njalo eyayichaza umuzi oqotho kanye lendoda uqobo. Ngenkomo lezi ngizathanda sigxile kusimo senkomo sokuzala kwazo. Ukuzala kwenkomo yikho okwandisa isibaya ngakho kuqakathekile ukuthi izigaba zonke lezi zinanzelelwe zaziwe ngokutshiyana kwazo langokuvela kwazo.
Singananzelela njalo ukuthi izolo bebevele bebiza ngesehlakalo hatshi ukuchaza ukuthi kuyini okwenzakeleyo .
(a) Inkomo esidabule: le yinkomo esisesigabeni sokulandelwa zinkunzi lapho ikusigaba sokumitha ngakho umelusi uyakunanzelela lokhu ukuze ananzelele lomhlobo wenkunzi elandela inkomo le ngoba yiyo phela ezaletha umhlobo wayo lapha ekhaya.
(b) Inkomo esilomthondo: le yinkomo esimithi. Kuqakathekile ukuthi inkomo emithiyo yondliwe ngemfanelo okokuthi lanxa bekuyileyo ebibotshwa yehliswe ejogweni ngoba ilakho ukuthi ingaphunza.
(c) Inkomo ethombelayo: le yinkomo etholakala ingasafuni kumunyisa ithole layo ngenxa yokuthi iyabe isimithi.Kuqakathekile-ke ukuthi ingabonakala isenza njalo kujongwe impawu zenkomo emithiyo kungabanjwelwa ithole ngamandla ukuthi limunye.
(d) Inkomo exakeleyo: Lapha-ke inkomo iyabe yehluleke ukuzala ngesikhathi ithi iyazala. Kwande ukuthi inkonyane iphume ngendlela engaqondanga njengoku ganxama ngokhalo lenyawo sezivele ngaphandle. Nxa sekunje kuyadingeka ukuthi incediswe, lokhu kuyincedisa kuthiwa yikuyikhokhela.
