uMthunywa
YiNtatheli kaMthunywa
ZIKHALA ezimathonsi izakhamizi zeHalale eMatopo ngenina lakule indawo eselibanjwe lamadoda abanikazi amahlanu osekusenza bacabangele ukuthi lilesagweba.
Inina leli, uSibikwaphi Moyo kubikwa laxotshwa ngumkalo uMnumzana Jealous Ndlovu ngemva kokumkhanda esemacansini loMnumzana Vincent Ncube.
UMthunywa uzwe ukuthi inina leli lathi lisizwa ukuba umkalo useye eGoli laphenduka emzini walo ngenyanga kaNhlolanja okuyikho lapho eselibanjwe lamadoda abanikazi amahlanu.
UMthunywa uxhumane loNkosazana Grace Dube wathi sebekhathele ngoMaMoyo ngokubathathela amadoda abo.
“UMaMoyo uphenduke lapha ngoNhlolanja lonyaka, kusukela lapho kuzofika khathesi usebanjwe lamadoda abanikazi amahlanu. Njengomama esigabeni sesisesaba ukuthi amadoda ethu ahambele phansi kwakhe.
“Sesikhathele ngaye ngoba kasisakwazi ukuthi ulani okwenza afunwe ngamadoda wonke. Lami nginje umkami ngake ngamthola elaye yikho nje ngisizwa ubuhlungu kodwa ngehluleka ukuyamthonisisa kosobhuku ngoba bathi akuvunyelwa ukumthonisisa umkakhe engekho,” kutsho uNkszn Dube.
UMnumzana Christopher Nkomo omunye owabanjwa lalelinina uthe yena ngeke akhulume lutho ngendaba le ngoba wazi ukuthi inina leli laxotshwa emendweni.
“Mina ngeke ngichaze lutho ngokuzwanana kwami loMaMoyo ngoba ngazi ukuthi waxotshwa emendweni ngakho akala ndoda. Okunye njalo ngivunyelwe ukuthatha isithembo ngakho kangilacala ngokuzwana laye,” kutsho uMnu Nkomo.
Ebuzwa ngale indaba uNkszn Moyo uthe yena wakhulumisana lomkakhe yikho ehlezi emzini wakhe njalo kathandani lendoda yomnikazi.
“Mina ngilomkami ngakhulumisana laye yikho ngihlezi emzini wami. Abantu bangiqambela amanga ukuthi ngithandana lamadoda abanikazi khona amadoda abo kuyiwo angifunayo,” kutsho uNkszn Moyo.
