uMthunywa
Cornelius Luphahla
ZISAMANGELE izakhamizi zesigabeni seZinangeni eLupane ngemva kokuba ingcwaba lenye indoda seliqede iminyaka emibili lisitsha ngemva kokutshaywa lizulu.
Isiga lesi siqalise ukwenzakala eminyakeni emibili eyadlulayo ngemva kokubhubha kukaMnumzana Jacob Mlalazi ebulawa yikutshaywa yintwabe okucatshangelwa ukuthi waphoswa ngumnewabo (ibizo siligodlile) bebanga amasimu.
Kuzwakale ukuthi ngemva kokuba ithuna likamuyi litshaywe lizulu lahlala iminyaka emibili lisitsha laze labohla okwadala ukuthi izihlobo zakhe zidinge inyanga ukuze licitshwe.
UMthunywa uvakatshele kule indawo wakhulumisana loMnumzana Micah Ndlovu oyisakhamuzi sakule indawo walandisa ngendaba le wabuya wathi iyamethusa kakhulu.
“Ingcwaba likaMlalazi lahlala iminyaka emibili lithunqa intuthu ngemva kokuba litshaywe yinkosazana. Lokhu kubikwa kwadalwa yikuthi umufi wayezondile ngoba wabulawa ngumfowabo (ibizo siligodlile) bebanga ukuthi kungani eyale ukumsikela amasimu.
“Kwathi kungakapheli inyanga ezimbili ebhubhile ithuna lakhe latshaywa yinkosazana bazama ukulicitsha lehlula. Ngemva kwalokho badinga inyanga labaphurofethi abehlukeneyo behluleka ukulungisa kwaze kwazolungisa inyanga uDlomo ngemva kweminyaka emibili. Ngalokhu isigaba sonke sisamangele ngendaba le,” kutsho uMnu Ndlovu.
Ekhuluma lentatheli uMnumzana Malaki Mlalazi umnawakhe kamuyi uMlalazi uthe laye indaba le iyamethusa ngoba inyanga yathi umnewabo wabulawa ekhaya yikho ithuna lisitsha.
“Kuliqiniso sibili ukuthi ithuna likamnewethu lahlala iminyaka emibili lisitsha ngemva kokutshaywa yinkosazana.
“Ngemva kwalokho sahamba ebantwini basitshela ukuthi indaba isekhaya njalo umfowethu wabulawa ekhaya ngalokhu uzama ukusichazela ukuthi wabulawa ekhaya.
“Sazama ukulicitsha lehlula laze lacina libohla lisiya phansi. Inyanga eyasincedayo nguDlomo onguye owalicitshayo sasesiligqibela kutsha.
“Noma nje wayethi uyenelisa ukubulala lowo owabulala umfowethu mina ngala ngoba ngibona ukuthi uzabulala umfowethu,” kutsho uMnu Mlalazi.
Imizamo yokukhulumisana loMnu Mlalazi onguye okucatshangelwa ukuthi waphosa umfowabo yehlule ngoba ubengekho emzini wakho.
