uMthunywa
SIYAQHUBEKA ngezihlahla zemvelo ezitshiyeneyo.
Ezinye sokwasala amabizo nje lazo kazisekho, kasisazazi sekuyindlela yokukhumbuzana ngazo ukuze lalapho sisizwa kukhulunywa ngazo sibe silolwazi ukuthi yizihlahla ezinjani.
Ezinye zazo yilezo esidla izithelo zazo ezakha njalo ziqinisa umzimba. Siyaqhubeka lazo
1) Igonde — Isihlahla lesi sithanda ukumila emahlabathini kanye lezintabeni yiso sibili esiyabe senile sithule zwi. Ingxoza yesihlahla lesi yiyo esetshenziswa entweni ezinengi.
Amahlamvu aso ande ngembala emihle etshiyeneyo. Isihlahla lesi siyasebenza lokubaswa nje kungela mkhuba
2) Ichithamuzi — Lesi yisihlahla esikhulayo sibili. Siba lamahlamvu akhula abe ngangesandla. Abezenkolo bakholwa ukuthi yisihlahla esingalunganga lesi bathi kuyazila ukusibasa kuthathelwa ebizweni laso elithi ichithamuzi.
Leso isihlahla kasisetshenziswa endaweni ezinengi ngesikhathi sebusika siphuma amanzi kasibaseki ngitsho. Inyanga kuphela yizo ezisisebenzisayo ekwelapheni.
3) Inkamamasane — Lesi yisihlahla esikhula sibe sikhulu loba nje singaqinanga, inkuni zaso ziyabhebha kuhle sibili.
Siphuma uchago olujiyileyo yikho lapho okuvela khona ibizo lamasana lawa. Abenkolo njalo bathi kuyazila ukutshaya inkomo ngoswazi lwesihlahla lesi ngoba ziyaphunza.
4) Inondo — Lesi yisihlahla esigcina amacimbi kakhulu. Abawagolayo baqonda lapho okulezihlahla zenondo khona. Siyakhula sibe sikhulu sibili kodwa kasilankuni, kasibaseki, kasibhebhi okuzwayo.
