uMthunywa
YiNtatheli kaMthunywa
NXA kulesikolo okumele sitshayelwe ihlombe ngokuphakamisa ithalenta lenguqu yamantombazana yiMagwegwe High koBulawayo.
Isikolo lesi sesibuse phose kuzo zonke inkezo ezincintiswayo kulesi sabelo kodwa sesihluphe ngokuhluthuna umbuso kunkezo yeCopa Coca-Cola.
Lonyaka kukhanya iqembu lamantombazana alesi isikolo alomdladla wokuphinda umphehlo nanko phela sesingene kumkhankaso wokudinga isikolo esizamela isabelo sakoBulawayo. Amanye amaqembu amantombazana azancintisa leMagwegwe High abalisa iSt Bernard’s, Sobukhazi, Mpopoma, Entumbane, Pumula, Townsend, Montrose, Emganwini, Nketa leNkulumane.
Inkezo yeCopa Coca-Cola, isekelwa ngemali yinkampani yeDelta Beverages njalo idlalelwa yizikolo zonke zelizwe kubanga labadlali abangaphansi kweminyaka elitshumi lanhlanu yokuzalwa.
Ngeviki edluleyo amantombazana eMagwegwe adlule lula enelisa ukufinyelela ihlandla lokudinga intshantshu ezamela iBulawayo.
Umphathisikolo ophethe inhlelo zenguqu ngaphansi kweNash uJohn Nzima ubike ukuthi imincintiswano enjengale kumele ibe yinkuthazo kuzikolo ukuthi ziqalise ukulolonga amantombazana kunguqu.
“Abantwana abangamankazana bayaswela amathuba okuzibonakalisa kundawo ezinengi, kodwa imincintiswano yenguqu enjenge Copa Coca-Cola inikeza ithuba lokuthi abantwabethu baveze ithalenta labo.” Kuqula labafana izikolo ezikhona ezizalwela ukumela iBulawayo kuleMzilikazi, iLuveve, iMasotsha, iSikhulile, iSt Bernard’s, Sobukhazi, Nketa, Christian Brothers College, Gifford loMilton.
