uMthunywa
Nkosilathi Sibanda
UKUSUNGULWA kwemidlalo yalonyaka yomqhudelwano weCopa Coca-Cola kuliviki kutsho ukuba izikolo sezilungele ukungena enkundleni.
Inkezo yeCopa Coca-Cola ihlanganisa zonke izikolo ezidlala inguqu kuziqinti zonke zelizwe njalo yiwo wodwa umncintiswano odibanisa amaqembu amantombazana ezikolo.
NgoLwesithathu bekuthe gwaqa osaziwayo benguqu kusungulwa imidlalo ka2017 esikolo seRujeko High esabelweni seMashonaland Central. Isikolo lesi yiso esanqoba kunkezo yomnyaka ka2016.
Kulumnyaka, iCopa Coca-Cola ihlukene ngoba izancintiswa ngabadlali abaleminyaka yokuzalwa engaphansi kwetshumi lanhlanu. Lokhu, ngokutsho kwabaqoqi bayo, kwenziwe kulandelwa uhlelo lwenhlanganiso yenguqu umhlaba wonke eyeFifa.
Umncintiswano lo uqhutshwa yinhlanganiso yabaphathi bezikolo iNash njalo wasungula eZimbabwe ngo1989, usekelwa yinkampani yeDelta Beverages ibambene leCoca-Cola kanye leMutare Bottling Company.
Inkampani yamanamunede iCoca-Cola yiyo ehlawulela imidlalo le.
Ukusungulwa kwenkezo yalonyaka kutsho ukuba imidlalo yokukhankasela ukuyafika ku-final yalinkezo isiqalisile ezinqintini zonke zelizwe.
Uhlelo olukhitshwe yiCopa Coca-Cola ubika ukuthi ihlandla lokudibana kwezikolo ezigabeni zonke lizakuba mhlaka 9 kuNhlangula. Intshantshu Izikolo ezizabhuqa ezinye kuhlandla lezabelo yizo ezizancintisa ku-final sekudingwa ingqwele zomdlalo enkundleni zesikolo zeBindura kusukela mhlaka 21 kusiya ku22 Ntulikazi.
Isikhulu seCoca-Cola uVee Chibanda uthe bakhangelele ukuthi lonyaka inkezo yeCopa Coca Cola izahlabusa ukwedlula wonke.
“Sikhangelele ukuthi imidlalo ka-2017 ikholisise wonke umuntu. Konke sekuhleliwe ukuthi imidlalo iqalise kusukela phansi sizesifike i-final ngoNtulikazi,” kutsho uChibanda.
