Uncategorized

Bathuthumele ngophondo olubulele abangu-7

18 May, 2017 - 00:05 0 Views
Bathuthumele ngophondo olubulele abangu-7 Umuzi kaMnumzana Dennis Dube

uMthunywa

Ncekwenhle Ncube
ZISELE zibambe eyangaphansi izakhamizi zeMatopo esigabeni seMlahlamkhonto kulandela ukukhutshwa kophondo obelugqiziswe amangqongqo emzini wesinye isakhamuzi okubikwa beselubulele amalunga emuli ayisikhombisa iminyaka ilandelana ngenyanga eyodwa uLwezi.

Udaba lolu olutshiye imuli yako SekaRanda Dube ithwele izibindi ngezandla luvele ngoMgqibelo kuviki edluleyo.

Kubikwa umphurofethi weZion owaziwa ngokuthi nguSweswe nguye ukhuphe uphondo kuleliguma.

Intatheli kaMthunywa ivakatshele kule indawo lapho exoxisane lezakhamizi zakule indawo ngodaba lolu olukhanya lusemlonyeni yabantu.

“Abantu babeyinhlabathi ngesikhathi kukhitshwa uphondo lolu olwalukhanya lusesabisa okwamagama. Abafundisi baqala ngokuchela ngamanzi alesawudo andubana baqale ukulugebha.

“Lwalugejelwe phambili kwendlu kagogo eyokulala. Bathi belukhupha lwalusesabisa ngoba lugqiziswe ubuhlalu kanye lamangqongqo angathi angumdaka,” kulandisa uNkosikazi Sobala Nkomo oyisakhamuzi kule indawo. Kuvele ukuthi uphondo lolu selwabulala amalunga akoDube ayisikhombisa njalo bafa ngoLwezi minyaka yonke.

UMnumzana Dennis Dube omunye wabantwana koSekaRanda uthe udaba olunjalo lwenzakala noma nje bengakwazi ukuthi ngubani owenza lesi sihluku.

“Kwaba yinto eyayikade isitshayisa ngamakhanda. Ukufa kwabafowethu bekungazwisiseki. Abantu abayisikhombisa batshona ngenyanga eyodwa. Konke lobaba watshona ngendlela ebuhlungu ngoLwezi.

“Sithe ngokuzwa ngomphurofethi weZion uSweswe samcela ukuthi azosincedisa. Kube lusizi ukuzwa ukuthi imuli yakithi yaphoswa. Wakhupha uphondo olungazwisisekiyo lugqizile,” kulandisa uMnu Dube.

“Khonapho ngoLwesihlanu kuzavuka kukhitshwa uphondo lolu kwafika uthekwane wahlala phezulu kwendlu wakhala. Umfowethu wathi ezama ukuthi amtshaye wabaleka. Kukhanya lakho ngokunye kwakhona obekuletha umnyama ngakithi.

“Silapha nje besihlalele evalweni ukuthi kuzalandela bani ngoba yinto eyenzakala minyaka yonke. Kuhle ngoba asizwanga ukuthi ngubani odala lesi senzo ngoba bekungaphambaniseka okunengi,” kuchaza uMnu Dube.

Usobhuku wakule indawo uMnumzana Titus Nkomo uthe udaba olunjalo lwenzakala esigabeni  sakhe.

“Kubuhlungu okwehlela abanye bethu empilweni. Kanti njalo sikhuza abantu ukuthi bengasebenzisi ubuthakathi ngoba busibulalela ubuntu bethu njengoMthwakazi,” kutsho uMnu Nkomo.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds