uMthunywa
Cornelius Luphahla
USAMANGELE umdeni wakoMpala esigabeni seLusulu eLupane ngemva kokuba omunye utsikamutanda ekhiphe abantwana ababili esiphaleni akade sebelenyanga becatshile esigabeni, uMthunywa uyakuveza lokhu lamhlanje.
Kuvele ukuba utsikamutanda, uSikhandamayezi ukhuphe abantwana bakaMnumzana Elias Mpala esiphaleni sikamnewabo uMengezi Mpala ngemva kokufa kwakhe.
Limbedumehlwana itshiye izakhamizi zeLusulu zinathisana itiye ngayo yenzakale kuviki ephelileyo.
Kucatshangelwa ukuba uMengezi wayefuna ukuphendula abantwana laba omatholwane.
UMthunywa ukhulumisane loMnumzana Benjamin Ndlovu ongumalume walababantwana wathi akathandabuzi ukuthi uMengezi nguye owayetshontshe abantwana laba.
“Abantwana basuka bethunywe nguyise kumnewabo kuntambama bahle banyamalala uMengezi wathi kababonanga. Ngemva kwalokho sadinga umphurofethi uSikhandamayezi wathi olesandla ekunyamalaleni kwabo uzakufa nxa engekela ukuphumela egcekeni ngezenzo zakhe.
“Kuthe kuviki ephelileyo sezwa sokuthiwa uMpala usehlanya ubiza amabizo abantwana abanyamalalayo. Lokhu kwasethusa kakhulu kwathi kusasa kwakhona sezwa kuthiwa usezibophele.
“Okwangimangalisayo yikuthi ngemva kokufa kwakhe uSikhandamayezi wathi abantwana abacatshayo basesiphaleni sikaMengezi wabakhipha bephila noma nje babengani kabasaphilanga kuhle engqondweni,” kutsho uMnu Ndlovu.
“Ngalokhu kangithandabuzi ukuthi uMpala nguye owayebanyamalalisile efuna ukubenza omatholwane bakhe yikho okwambulalisayo ngoba wayegangile sibili,” kutsho uMnu Ndlovu.
Ebuzwa ngale indaba uyise walababantwana uthe laye udidekile ngokwenzakalayo njalo konke nje kusansumansumane ngoba wayengacabangeli ukuthi abantwana bagcinwe ngumnewabo kodwa uyajabula ngoba sebebonakele.
“Lami ngiphicekile ngokutholakala kwabantwabami esiphaleni sikamnewethu njalo ngizwa ubuhlungu ngokufa kwakhe. Noma kunjalo ngangingacabangeli ukuthi abantwabami bengabe benyamalaliswe ngumnewethu kodwa okungijabulisayo yikuthi sebebonakele,” kutsho uMnu Elias Mpala.
Usobhuku wakule indawo uMnumzana Matthias Ndlovu ebuzwa ngale indaba uvumile ukuthi uyayazi wathi laye iyamesabisa.
“Kuliqiniso sibili ukuthi abantwana bakoMpala ababenyamalele batholakale esiphaleni sikayise omdala ngemva kokubhubha kwakhe. Lokhu kungimangalise kakhulu ngoba akukaze kwenzakale indaba enjalo kule indawo,” kuphetha uMnu Ndlovu.
