uMthunywa
Nkosilathi Sibanda
UMAQHUZU omutsha weHighlanders uNhlanhla Bahlangene Dube uthembisa ukuthi nguye umkhokheli ozaletha inguquko kuleliqembu ngokuncedisa ukuthi lithole imali enengi.
UDube uqhatshwe kuliviki kulandela ukusuka kukaNdumiso Gumede esikhundleni esifanayo ngesizini edluleyo.
Ekhuluma lentatheli ngoLwesithathu ekuseni, uDube kazange aphuze ukuzibika ukuthi uzakuba yinkokheli enjani.
Ubike ukuba ngaphansi kombuso wakhe iHighlanders ayisoke yenze izinto ngendlela ejwayelekileyo.
Isithembiso sikaDube ngesokutshintsha iBosso, iphenduke ibeliqembu elizahlonitshwa kunguqu lakumabhizimusi.
Loba eyinkokheli endala kunguqu, inengi labasekeli beBosso abazi ukuthi uDube uyisikhwicamfundo kwezokumakethwa kwamabhizimuzi njalo nguye umuntu obedingwa yiHighlanders.
Isikhulu seqembu uMordern Ngwenya ubike ngokuphangisa ukuthi akula omunye umuntu obengaqhatshwa ngaphandle kukaDube.
“Inyathelo lokuqhatshwa kukaDube yilo ebelifanele. Akula omunye obengabamba isikhundla lesi ngaphandle kukaNhlanhla Bahlangene Dube. Ibhodi yethu iyasuthiseka ngakho wonke amalunga ethu labasekeli kumele bamnikeze ithuba asebenze,” nguNgwenya lo.
Esethula umbiko wakhe wokuqala njengomaqhuzu wethimu yezwe lonke, uDube uthe owakhe umsebenzi yikuletha ubucwazicwazi lempumela esambeni seqembu.
“Ngilokuthaba okukhulu ngokuthola kwami lumsebenzi wokuba ngumaqhuzu weHighlanders. Ngilembali enhle kunguqu, okwenza kubelula ukuthi ngiphathe lumsebenzi.
“Inhloso yami yikuthi sidinge ezinye indlela zokukhukhumeza isikhwama seqembu. Abalandeli bethu, ngobunengi babo angeke basinikeze imali esiyifunayo. Kumele sikuzwisise ukuthi inguqu iyaguquka. Ihofisi yami izadinga wonke amaqhinga wokuthi iBosso ithole imali. Lokhu kuzathatha isikhathi,” kutsho uDube.
UDube wazise ukuba labo abasebenzisa impahla yeBosso ukwenza imali, abakhohlwe ngokuthi bazaqhubeka besenza okufanayo.
“Iqembu lilosekelo olukhulu ngakho akumangalisi ukuthi kube labantu abafisa ukuba yiBosso. Esizakwenza yikuthi sikhiphe impahla yeqembu eyiyo. Phezulu kwalokhu, kumasizini alandelayo, iHighlanders izakhokhela kwezebhimimusi lenguqu ilizwe lonke,” kubika uDube.
UDube uphiwe isivumelwano seminyaka emibili kodwa isivumelwano lesi silakho ukwengezwa nxa esebenze kuhle.
