uMthunywa
NguMsilisi Dube
KULEJAHA lesigabeni seLusulu, eBinga elithe ngemva kokuthola umaqondana walo latshontsha inkomo kamakhelwane layayithengisa njengendlela yokudinga imali yokuvela.
Umsolwa uTwalumba Sikachalinga oleminyaka engu-24 yokuzalwa kubikwa watshontsha inkomo kamamangala uHonest Ndlovu phakathi laphakathi kwenyanga ephelileyo wayithengisela esinye isakhamuzi.
Inkundla izwe ukuthi umsolwa wathengisa linkomo ngemali engange$200.
Kuzwakale ukuthi phakathi laphakathi kwenyanga kaMbimbitho kuwonalo umnyaka umamangala watshontsha linkomo kamsolwa emadlelweni wayiqhuba wayayithengisela esinye isakhamuzi esihlala eLuhumbe eLusulu.
Kubikwa umamangala wadinga isifuyo sakhe okwensuku ezimbalwa ngakho wancwetshwa indlebe ngesinye isakhamuzi ukuthi leyo nkomo yayike yabonakala iqhutshwa ngumsolwa.
Ngemva kwalokhu umamangala kubikwa waqonda umsolwa wambuza ngesifuyo sakhe okuyikho okwabangela ukuthi ababili laba bacine besilwa.
Ngenxa yalokhu, umamangala kubikwa waphanga wayabikela amapholisa esigaba wona ayiwo abopha umsolwa.
Uchwayisiso lwamapholisa kubikwa lwathola umsolwa elecala kukanti laleyo nkomo kamamangala yatholakala.
Umsolwa ubemiswe emthethwandaba weBinga ngoMvulo weviki edluleyo esetheswa icala lokutshontsha isifuyo.
Umsolwa ulivumile icala njalo utshele umantshi uMnumzana Stephen Ndlovu ukuthi wathengisa isifuyo sikamsolwa ngoba wayedinga imali yokuvelela isithandwa sakhe angathandanga ukusiqamba ngebizo.
Umtshutshisi wecala leli bekunguMnumzana Bruce Maphosa.
