uMthunywa
Cornelius Luphahla
KUZABE kusindwe ngobethole eTshabalala Terminus edolobheni lakoBulawayo lapho okuzabe kubukuzela khona amantombazana abumbekileyo ngenhloso yokukhethwa kwentshantshu kwezokutayila kanye lokufundisa intsha ngokuziphatha kuhle.
Umkhosi lo uhlelwe liqembu elibona ngezokutayila iBright Future incediswa yiKhaya Arts. Umkhosi wokutayila lo uzakubakhona mhlaka 6 elokitshini leTshabalala lapho amaqembu amajaha lamantombazana amahle azabe ejabulisa khona uzulu kusukela ekuseni kuze kuyelamula ukutshona kwelanga.
UMthunywa ukhulumisane loFuture Dube onguye umholi weqembu leKhaya Arts elihlele umkhosi lo wathi okwenze bahlela umkhosi lo yikuthi bafuna ukukhuthaza intsha ngokuqakatheka kokuziphatha kanye lokuzivikela kumikhuhlane etshiyeneyo.
“Umkhosi wethu lo uhlelwe yiBright Future iqembu elizalwa yiKhaya Arts njalo ngowokukhuthaza kakhulu intsha ngokuziphatha kuhle kanye lokuzivikela emkhuhlaneni weHIV leAids. Okunye njalo sizabe sifundisa ngobubi bezidakamizwa kanye lengozi yazo emizimbeni yabantu.
“Ngalokhu umkhosi lo siwuhlele ngemva kokunanzelela ukuthi inengi lentsha liyabuyela ezikolo ngakho sifuna ukuthi lihambe lilenkuthazo enhle kwezempilakahle. Ngokunjalo emkhosini lo sizakhetha uMiss Bright Future onguye ozabe edlule bonke kwezokutayila njalo lowo muntu uzathola umvuzo,” kutsho uFuture Dube.
