uMthunywa
Ncekwenhle Ncube
KULANDELA ukukhitshwa kombiko wokuthi kulemuli yeSpaza eMlomoliwoto kuWadi 5 elomuzi osuleviki ulavuka amalangabi, sekuvele ukuba kulophondo oluphazima umlilo olubangela lokhu.
Umfundisi webandla leThe Apostolic Church of God and Universe, uMnumzana Khawulani Ntini ukhuphe uphondo lolu okucatshangelwa ukuthi yilo olutshisa izindlu zikaMnumzana Henry Malunga ngeviki ephelileyo.
Kuzwakale ukuthi lanxa uphondo lolu selukhitshiwe emzini kaMnu Malunga isimanga yikuthi impahla sezisitsha ngamandla ziphandle.
Intatheli izwe ukuthi ngemva kwemizamo yokudingisisa isisusa somlilo lo osutshiye uMnu Malunga engela lutho, uMfundisi uNtini uvakatshele umzalwane lo lapho afike wakhupha uphondo olwesabisayo.
UMthunywa oxoxisane loMfundisi uNtini waveza ukuthi into efana laleyo bayikhupha.
“Silusizi ngomzalwane wethu owehlelwe yimimoya emibi. Ngemva komthandazo omkhulu sakhupha uphondo olwaluphakathi kwevazi (vase) luthandelwe ngewulu (wool) phezulu lungathi luyaphefumula luphazima kancane.
“Kwasithatha isikhathi eside ukuthi sitshise uphondo lolu ngoba lwalusala ukulumatha. Sazama ukulutshisa nge-diesel kodwa umlilo wawucitsha. Saze senza okokululumathisa ngobulongwe benkomo,” kuchasisa uMfundisi uNtini.
Uqhubekele phambili esithi ngemva kokukhitshwa kophondo lolu kwahlala insuku ezimbili impahla zingasatshi.
“Noma nje kwake kwathi cosololo okwamalanga amabili ukutsha kwempahla kodwa kwabuya kwaqala phansi ngoba sokuze kutshisa impahla ezifakwe phandle.
“Sikhangelele ukubuyela njalo koMalunga ngoMgqibelo kuviki ezayo ukuyalala sithandaza khona,” kuchaza uMfundisi uNtini.
UNkosikazi Matilda Malunga uthe laye kakuzwisisi ukuthi kuhamba njani emzini wakhe.
“Ngididekile angikwazi ukuthi kuhamba njani. Impahla zimane zithunqe zodwa kungela muntu ophemba umlilo wakhona. Ngikhuluma nje khathesi ijesi kababa iqeda kuthunqa yodwa. Itshe yaphela du.
“Abebandla yibo abasincedayo. Nxa bekhona akutshi kodwa ukuvele bephume kancane kuyalumatha,” kuchaza uNkkz Malunga.
Ubuye njalo wacela umphakathi ukuthi nxa ekhona ongenelisa ukubasiza abasondelele ngoba sebehlalele evalweni ngesiga lesi njalo imizamo siminengi kungatshintshi.
