uMthunywa
Cornelius Luphahla
KULOMFUNDISI webandla leApostolic Church in Zion esigabeni sakoDobola eBinga ofelwe ngabantwana abane betshaywa lizulu kwathi omunye lamtshiya ebangwa lezibi, uMthunywa uyakuveza lokhu lamhlanje.
Umfundisi uEdison Ndlovu uqale ukwehlelwa ngamashwa la, nyakenye ngenyanga kaLwezi lapho izulu elatshaya abantwabakhe ababili bafa.
Kuvele ukuba kuviki ephelileyo izulu liphinde njalo latshaya abantwana abathathu kwafa ababili kwasila oyedwa ngokulambisa.
UMthunywa uxhumane loMnumzana Martin Ncube ongomunye wabazalwane bakamfundisi lo wathi kalankani ngesiga esibehleleyo njengebandla njalo kabakaze bakubone lokhe bathwetshulwa yingwe.
“Mina kangilankani ngesiga lesi esisehleleyo njalo kungiqeda amandla ngoba kangikaze ngikubone lokhe ngazalwayo. Isimanga yikuthi inkosazana le yaqalisa ngokutshaya abantwana bakamfundisi ababili bevela enkomeni bahle bafela khonapho sathi yingozi nje kanti kasikaboni lutho.
“Kuthe kuviki ephelileyo izulu lahloma ngesikhatshana ngezwa sengibizwa sokuthiwa selitshaye abantwana bakamfundisi abathathu kwafa ababili. Ngikhuluma nje sibabekile lo olimeleyo uyelatshwa kubaphurofethi kodwa nguye yedwa oseleyo njengoba babezelwe bebahlanu,” kutsho uMnu Ncube.
Ekhuluma lentatheli uNkosikazi Angeline Ndlovu ongumkamfundisi lo uthe yena ngeke akhulume lutho ngoba usakhalela abantwabakhe abamtshiya mahlayana nje.
“Mina okwamanje ngeke ngikhulume lutho ngoba ngisakhalela abantwabami abangiphunyuka ngilibele nje lecala lami kangilazi,” kutsho uNkkz Ndlovu.
UMfundisi uNdlovu ebuzwa ngale indaba uvumile ukuthi yenzakala wathi kodwa kakwazi ukuthi kwenziwa nguMlimu kumbe ngabantu njalo yena kalacala lomuntu.
“Kuliqiniso sibili ukuthi sengiphelelwe ngabantwana bethathwa yinkosazana kodwa kangikwazi ukuthi kwenziwa ngabantu kumbe yintando yeNkosi. Noma kunjalo nxa kusenziwa ngabantu uNkulunkulu uzababona ngoba mina kangilacala lomuntu,” kutsho uMfundisi uNdlovu.
Induna yakule indawo uDobola ebuzwa ngale indaba uvumile ukuthi uyayazi wathi laye iyamethusa kakhulu.
“Kuliqiniso ukuthi kulomfundisi osephelelwe ngabantwana betshaywa lizulu esigabeni kodwa kangikwazi ukuthi kubangelwa yini ngakho ngisazodingisisa ukuze sisize umdeni engozini le,” kuphetha induna uDobola.
