uMthunywa
Ncekwenhle Ncube
ABALIMI sebekhuthazwe ukuthi njengoba sekuqala isikhathi somqando baqalise ukuthena izifuyo zabo ukuze kuthi kusiyafika isikhathi sokutshisa amanxeba esepholile.
Ekhuluma lentatheli kaMthunywa uMnumzana Mthobi Ndiweni uthe abalimi bonke abalecebo lokuthena izifuyo zabo kanye lokutshisa impondo kumele beqalise nje khathesi.
“Sikhuthaza abalimi ukuthi baqalise khathesi ukuthena izifuyo zabo ukuze nxa kufika isikhathi sokutshisa amanxeba abe esepholile.
“Isikhathi somqando sihle kakhulu ngoba amanxeba ezifuyo awabhibhidli kanti njalo lempukane azizinengi.
“Sikhuthaza abalimi ukuthi batshise impondo ukuze nxa sebesiya thengisa izifuyo zabo imali yabo ingehli. Lokhu kungenxa yokuthi abathenga inkomo bande ukwehlisa imali ngoba impondo zingabalwa,” kulandisa uMnu Ndiweni.
“Labo abasaqalisa ukutshisa inkomo impondo sibakhuthaza ukuthi basondelele abalimi abaseduze labo ukuze bancediswe ngendlela zokutshisa impondo.
“Kodwa-ke nxa kungamajongosi asekhulile impondo seziphumile zaba zinkulu kumele beqale ngokuziquma andubana zitshiswe,” kuchaza uMnu Ndiweni.
Ubuye njalo wagcizelela ukuthi nxa inkomo zitshiswa impondo abalimi kumele babone ukuthi insimbi abayisebenzisayo iyatshisa kakhulu ukuze ingalimazi.
Abalimi bakhuthazwa njalo ukuthi bathene inkomo ezibukela samjanja ukuze bengalahlekelwa ngumhlobo omkhulu ozaletha imali nxa bethengisa.
