uMthunywa
Thokozile Mbedzi
ABALIMI bakhuthazwa ukuthi basebenzise amandla elanga ukudonsa amanzi okuthelela izilimo zabo ngoba indleko zawo ziphansi.
Ekhuluma lentatheli kaMthunywa, eseZimbabwe International Trade Fair, uMnumzana Muta Mangombe onguProjects Administrator eForster Irrigation Company uthe kumbukiso walonyaka bakhuthaza abalimi ukuthi badonse amanzi besebenzisa ilanga ukuze babe lenzuzo enengi.
Uthe ukusebenzisa amandla elanga kulendleko eziphansi kakhulu kulokusebenzisa amagetsi.
“Abalimi bangathenga ama-solar panel, hose pipe, impompi zokufafaza (sprinklers) kanye lamatanka bayenelisa ukukusebenzisa iminyaka eminengi kukanti bona belakho ukuthola inzuzo okwesikhathi eside.
“Lonyaka sibukisa i15 solar panel, itanka ye30 000-litres kanye lempompi zokufafaza ukuze sitshengise abalimi ukuthi kusebenza njani.
“Sabelana ulwazi ngoba kulabanye abalemigodi, abanye basebenzisa uhlelo lokuvuna amanzi emadamu kungakho sibapha ulwazi lokuthi bangasebenzisa njani impahla lezi ukuze babe lesivuno esiphezulu,” kulandisa uMnu Mangombe.
“Ubuhle bamandla elanga yikuthi akukhathalekile ukuba usedolobheni loba emaphandleni wonke umlimi uyenelisa ukuwasebenzisa. Kungakho sikhuthaza abalimi ukuthi basebenzise amandla elanga ngoba elizweni lethu silenhlanhla yokuba sithola ilanga ngazo zonke izikhathi.
Uqhubekele phambili ekhuthaza abalimi ukuba bengakasebenzisi impahla le kumele babone ukuba inhlabathi yabo iyalingana (level) ukuze kungabi lokugugudeka komhlabathi okungacina kubangela ukuthi isivuno somlimi sehle.
“Umlimi kumele alungise umhlabathi ukuze ulingane kuhle ukuze ungagugudeki,” kutsho uMnu Mangombe.
UMnu Mangombe uphethe ngokucebisa abalimi ukuthi bakhululeke babavakatshele ukuze babaphe ulwazi ngokusebenzisa ilanga ekudonseni amanzi esuka emigodini, emadamu kanye lasematankeni.
