uMthunywa
silo Pumulani Mpofu
Ensukwini esesiphila kuzo sokufuneka abantu abazakuma isibindi babekwazi ukuthi baphilelani njalo bakwazi okudingakalayo ukuze bazithuthukise empilweni nje. Ikanti bakhona abantu abazula umhlaba wonke bezama ukuziphilisa kodwa kungakhanyi lutho abaluvunayo kumbe lokho abakwenzayo kungalethi ngitsho inzuzo ekhanyayo.
Kuyakube kukuhle ukuthi iloba abantu bezuza inzuzo encane iqogelelwe isetshenziswe ngokufaneleyo ukuze ilethe inguquko emulini kunye laselizweni.
Okudala inguquko empilweni yakho kuqala kuwe ngoba engekho ozavela komakhelwane ukuzokuncedisa ukuzithuthukisa. Ngenxa yobunzima bokuthola imali akekho ongadela umuzi wakhe amelane lokunakekela imuli yomunye. Bantu bakithi, asiphakameni sivule inkophe sidingisise okungasithuthukisa ukuze impilo zethu zingahlali zimi ndawonye.
Akulanto ezwisa ubuhlungu njengokuhlala ubanjelwe ndawonye ezinkini yobunzima ikanti abantu belazo ingqondo kunye lezandla zokuziphandela izindlela zokuphuma kulobobunzima. Ithendele elihle ngelikhala ligijima mahlabezulu, asikufundeni lokhu.
Emavikini ambalwa adluleyo eTrinity Project ngike ngathola ithuba elihle lokukhulumisana loNkosikhona Mhlanga (15) obeqhubana logogo wakhe ozala unina. UNkosikhona wazalelwa eGoli kuthe eseleminyaka eyisikhombisa unina wamthumeza lomalayitsha ukuze abuye azoqala ugwalo lwakuqala lapha ekhaya. Uhlupho olwehlela uNkosikhona yikuthi ngesikhathi evela eGoli walahlekelwa yisikhwama sakhe emoteni ayeyigadile ngemva kokuthi ife endleleni.
Kukhanya imota isilungile isikhwama sakhe sakhohlakala lapho okwakufele khona imota. Isikhwama sikaNkosikhona silahleka nje silempahla zakhe zokugqoka kunye lekhadi lakhe lokuzalwa, i-health card. Ugogo wakhe kakwazi lokuthi aqalele ngaphi ukuze atholele umzukulu wakhe incwadi yokuzalwa ngoba uthi yena usekhathele ngokuhlala ebona umzukulu wakhe exotshiwe esikolo ngoba engelayo incwadi yokuzalwa. Ugogo kaNkosikhona uthi ngemva kokunanzelela ukuthi umzukulu wakhe wayelahle isikhwama ngelanga elilandelayo wagadisa umntakamakhelwane ukuthi ayesidinga lesosikhwama kodwa ububi yikuthi wahambela ubabhemi ofileyo.
Ngakho ugogo kaNkosikhona samcebisa ukuthi kafonele unina kaNkosikhona amazise ngohlupho olwehlela umntanakhe ukuze aye esibhedlela lapho abelethela khona.
Ngemva kwenyanga eyodwa unina kaNkosikhona wahamba esibhedlela salapho ayebelethele khona ngakho wafika wabalandisela uhlupho lwakhe omongikazi balapho basebemlobela i-birth confirmation record. Unina kaNkosikhona uthe eselitholile leliphetshana walithumeza ndawonye lefothokhophi yesithupha sakhe, incwadi yokuzalwa, incwadi yokuhamba iphasipoti, i-receipt eyayifakaza ukuthi ubhadale imali engamarandi alikhulu letshumi (R110), imali engamadola alitshumi lanhlanu kunye le-affidavit enika unina imvumo yokuthathela uNkosikhona incwadi yokuzalwa lapha emahofisini kaHulumende eRegistry office.
Amaphepha la athunyezwa nje wonke alesidindo seZimbabwe Consulate etholakala khonanale eGoli. Kuthe ngemva kwenyanga eyodwa ugogo kaNkosikhona wamukela lezo ncwadi wasezihambisa emahofisini kaHulumede eRegistry Office. Evikini edluleyo ugogo kaNkosikhona uthutshe ethabe emanzi nte emahofisini eTrinity Project ngoba eseyitholile incwadi yokuzalwa yomzukulu wakhe.
Ngikhuluma nje uNkosikhona laye useziphilela ekhululekile eselayo incwadi yokuzalwa.
Asidibaneni kuviki elizayo njalo.
Umlobi utholakala kukheli ethi [email protected] kumbe kunombolo ezithi 0773195055
