uMthunywa
Kangilasizatho sokuphila
KHULU: Besesileminyaka engu-15 sitshadile lomkami. Silendodana eleminyaka engu-16. Ngomnyaka ophelileyo umkami wathi usefuna ukuthi siqume umtshado. Ngangingakucabangeli lokho kungakho kwangethusa kakhulu. Yebo kwakusiba khona ukungazwanani kodwa yinto ekhona ebantwini abatshadileyo, lanxa kwakunjalo mina ngangingasoli lutho.
Ngangimthanda ngenhliziyo yami yonke njalo ngangizama ukuba ngumama oqotho. Wathi yena usethandana lomunye umama njalo ufuna ukumtshada. Kwaba nzima ukuthi ngikwamukele, ngaleso sikhathi umhlaba ngasengiwubona usudilikile. Ngazama ukumncenga ukuthi angangitshiyi kodwa wephulela izogodo endlebeni, ngoba wacina emthethe lowo ntombazana.
Waphuma wangitshiya lendlu lomntwana kodwa uhlupho esengilalo Khulu yikuthi kangiselaso isizatho sokuphila. Lanxa ngilomsebenzi wami omuhle engiwuthandayo kodwa sekunzima ukuthi ngivuke ekuseni ngiye emsebenzini. Khulu ubona angani kuzakwedlula yini lokhu? Kambe ngizaphinda ngithabe futhi empilweni yami?
IMPENDULO
Indaba leyo izadlula njengothuli lwamadube, ngokubekezela uzathaba sibili futhi ungavumeli leyo mbandezelo hamba ukhuleke eNkosini yakho. Qina ukhumbule ukuthi indodana yakho leyo othi ileminyaka engu-16 isikhangele wena njengoba uyise eseyidelile wayahlala lenye intombi. Lokhu akube yisifundo njalo kwabanye abesifazane ukuthi kabaphileli omkabo kodwa bayaziphilela bona. Sebenza ungavumeli ukukhathazeka nge-stress empilweni yakho.
Ngelinye ilanga eliyisithutha uzakukhumbula.
Ngithandana lomntakamalume
KHULU: Ngingumfana oleminyaka engu-27 ngithandana lomntakamalume. Ngifuna ukumthatha, kulungile yini kumbe ngiyabe sengiphambanisa?
Impendulo
Akusisosimanga lokhu ngoba kwakusenziwa lokho oyikhona lamuhla. Abantu bengakabi banengi babephila impilo enjalo. Khona lokhu osukwenzile ngumthandano wabantu bakudala njalo yikho okwakusenza imizi engelakwehlukana. Kambe wawuzakwehlukana njani lomama wakho? Lomntakamalume wakho yingxenye kamama wakho. Isiko lemilayo yenu aliyifundiswa muntu. Ngaleyondlela akula divosi phakathi kwenu lobabili. Udubo lwenu lonke lwehlukaniswa ngogogo labokhulu abalizalayo.
Kuhle umthathe kodwa uhlawule ngenkomo emhlophe engelatshatha. Lokhu uyabe uquma ubuhlobo. Inkomo le emhlophe izacitsha ihlazo ngemva kwalokho lizazala usapho oluzothileyo, yenza ungadeleli amasiko ngoba lingazala abantwana abayiziyingayinga. Qhuba isiko phambili khona lizahlala kuhle. Khona kuyaphila awonanga lutho kodwa yikuqinisa ubuhle.
