uMthunywa
Cornelius Luphahla
KUZABE kungabizwa ozwayo eHilbrow Theatre lapho iqembu leMartin leNdolwane Super Sounds elizabe likhipha khona idlalade lalo elitshisayo okukade lalindelwa nguzulu.
Umkhosi lo uzakuba khona mhlaka 29 Mabasa ntambama ngehola lesikhombisa ntambama kuze kuyelamula ukuphuma kwelanga.
Kubikwa uMartin Sibanda uzabe esethula idlalade lakhe elithi Konke Sizokulungisa, noma nje selike lathengiswa ngokungekho emthethweni.
UMthunywa uxhumane loMqondisi waleliqembu uDenzel Dube wathi ukhuthaza uzulu ukuthi aphatheke emkhosini lo azozibonela ukudla kwamehlo wabuya wathi idlalade leli lehlukene laleli elakhutshwa ngokungekho emthethweni.
“Mina ngikhuthaza uzulu ukuthi aphatheke emkhosini wokukhitshwa kwedlalade leli ukuze bathuthukise umculo wakithi ngoba nxa bengasawusekelanga ngeke uthuthuke uzatshabalala. Okunye njalo ngithanda ukuchazela uzulu ukuthi idlalade leli lehlukene lelakhitshwa ngokungekho emthethweni ngoba leli lilengoma eziyisikhombisa njalo eziphekekileyo.
“Ngalokhu emkhosini lo abantu bazamangala kakhulu ngoba bazabona akade bengakukhangelelanga njalo amaqembu azabe encedisa ekukhitshweni kwalelidlalade yiDupute Warriors kanye leBig Five,” kutsho uDenzel Dube.
Ekhuluma lentatheli uThandazani Nyoni ongomunye umqondisi waleliqembu uthe emkhosini lo lelidlalade elitsha lizabe litholakala wabuya njalo wathi umkhosi lo uzakubakhona njalo lakoBulawayo kunyanga ezayo.
“Ngikhuthaza uzulu ukuthi abuye ezilungiselele ngoba idlalade leli elitsha lizabe lithengiswa emkhosini lo njalo abantu abafuna ukuthenga lelidlalade bakhululeke. Mhlaka 6 Nkwenkwezi umkhosi wokukhitshwa kwedlalade leli uzakuba khona kwelakithi koBulawayo eBulawayo Theatre ngakho abantu kabahlale belindele ezimnandi kuphela,” kutsho uThandazani Nyoni.
