uMthunywa
Silo Ophezulu Stinta kugwalo
Ngeviki edluleyo sitshiye abantu bethe gwaqa emzini kaNgonyama. Behlangene ngoMaMsie, injongo kuyikuqondisa izigwenxa ezazithe zabakhona lokuletha ukuthula. Siyafunda ukuthi amakhanda nxa ethe mbo ndawonye ebonisana exoxisana alakho ukuphuma lento kumbe isinqumo esakhayo.
Okunye njalo siyananzelela ukuthi abantu nxa bexabana kumbe kulokungazwisisani nxa bebodwa ngeke baze baluxazulule udaba lwabo, kudingeka kube lomunye umuntu ozakhangela udaba nxa zonke, ngoba nxa bebodwa umuntu ukhangela lokho okujabulisa umoya wakhe kuphela.
Sekuxoxiwe-ke lapha ekhaya, uNgonyama wasizwa isicelo lokukhala kukaNsingo wabeka izinqumo okwakufanele uMaMsie azilandele lapha ekhaya. Indlela ezabekwa ngayo zazitshengisa sobala ukuthi uMaMsie lapha ekhaya wayesilela kakhulu kumlandu wokuba linina kucaca akulalutho ngitsho ayelubamba yena ngezakhe izandla okugoqela ukuphekela umkakhe, ukuhlanza indlu yakhe yokulala.
Izinqumo ezabekwa nguNgonyama zamchaza kwabasobala ukuthi wayengasilo nina eliqotho lapha ekhaya. Wahle wakubeka sobala uNgonyama ukuthi nxa kwakukhona okwakunzima lapho kwakukuhle nje bahle bavalelisane.
Bonke ababesendlini lapha babona bengatshelwanga ukuthi uNgonyama wayezondile egane unwabu ngoba kwakungajayelekanga ukuthi umkhwenyana akhulume kanje phambi kukayisezala. UMaMsie laye wayesefile ngaphakathi njengoba kwasekumcacela nje ukuthi izimiso lezi zazihloseni. Ngakho-ke wavuma ngelomuntu osemlindini ukuthi uzazilandela.
UMaMsie wayekuthanda ukuziyenga. Ngemva kwezimiso lezi uyaziyenga njalo ngelithi uNgonyama mhlawumbe wayezama nje ukumbona ukuthi uzakwenzani kakukho okutheni ayezakwenza. UNsingo wayengathi uyifunda esiphaqeni ingqondo yomntanakhe ngakho wathi kakhulumele phezulu ukuze abantu bonke abasendlini lapha bamuzwe njengoba bengofakazi bento yonke.
UNsingo engakavalelisi wake waba lethuba elifitshane loMaMsie wake wamkhalimela okwamagama, emkhuza ngabanzi ukuthi ibele lendlela kalivuthwa nxa esekhethe ukuba kuleso simo bona kabazimiselanga ukubuya njalo bazohlangana ngodaba olufana lalolu. Waqonqosela lokuthi ayekele ukuhlaza umuzi wakibo. Lapha-ke yena uMaMsie wabonga wagomela ukuthi uyise kavusanga ezindala. Lachitheka idale yaphela indaba, okwasekusele-ke yikuthi uMaMsie athathe ingqobe.
UNgonyama loMaMsie basala-ke sebekhangelene loba nje babezama ukuxoxa kodwa ingxoxo yabo yayingayi ndawo, yayiduma nje. Kwala lalapho uMaMsie ezama ngazo zonke indlela ukuthi ajabulise uNgonyama ngamaqhinga wonke esintwana, kodwa konke lokhu kwakusenza uNgonyama acunuke ngamandla, ngoba wayesuka afikelwe ngumfanekiso kaJoza uthe mpo phakathi kwabo. Wayezisola lokuthi kungani nje evele engazange ahle amxotshe wazisalela etshaywa ngumoya. UMaMsie yena wayesadalala lapha endlini ezama ukubindana lemisebenzi yalapha ayevele engasayithinti ngitsho ngesakhe isandla. UGogola wayemzwela loba nje wayemona emenzela konke lokhu, yena adidizele uNgonyama nxa esevela emsebenzini.
