Ukuhlaziya inkondlo: Imisebe yelanga

27 Apr, 2017 - 00:04 0 Views

uMthunywa

Imbongi nguNgema Hlumbayo
Isihloko senkondlo — Khokho vuk’ubone

OKOKUQALA ngithanda ukuxolisa kubafundi balelikhasi lapha esihlaziya khona inkondlo. Kwaba lephutha lapho inkondlo engiyihlolisise kuviki ephelileyo ngathi ngekaDedani Moyo yona ingekaNgema Hlumbayo imbongi esicubungula enye inkondlo yayo njalo lamhlanje. Linanzelele bafundi ukuthi zilokuhambelana lezinkondlo lanxa zikhuluma ngento ezitshiyeneyo.

Nanzelelani ukuthi zonke zilendikimba yokulahla amasiko. Eyokuqala ikhuluma ngabantu abangasahloniphi umngcwabo kanti lalamhla lokhu imbongi ikhala ngabantu asebelahle ubuzwe babo. Imbongi isifisa lokuthi aluba ukhokho wayo uyavuka abone lokhu osekusenzakala ngoba yena wafa engakakuboni lokhu kuchitheka kobuzwe.

Imbongi itshela ukhokho wayo ukuthi inzalo yakhe kayisananzi ubuzwe babo okuyikuthi abasahloniphi ubuntu babo.

Inhlonipho yesizwe ebikhona izolo (kudala) kayisekho lamhla. Abakhathesi kabasazihloniphi ukuba yibo kwabo.

Ngokubona kwembongi sekugcwele ububi elizweni obuyibo obubulala isizwe. Izwe seliyize ngoba akusela kuhloniphana elizweni. Izinto zonke seziguqukile njengoba kungaselamthetho imbongi ize ithi, “Ngezinyawo mpo usum’umhlaba.” Iyaqhubeka imbongi ithi uzohlaba phela umhlaba njengoba ungumhlaba kanti lowo umhlaba omhlabayo uzamkhumbula ukhokho.

Imbongi iyaphikelela imvusa ukhokho wayo ukuthi kavuke abone. Umbuzo esingawubuza yikuthi avuke aboneni yena khokho lowo? Kuthiwa akusela kuthula ebantwini. Sekugcwele udlame yonke indawo ngoba lezindlini belo akusela kuhlaliseka. Ubaba lomama endlini bavukelana njalonje. Akumi lapho kuphela kodwa kuthiwa ubaba uhlanjazwa ngezitho zakhe, athukwe ngokungabi yindoda kwakhe. Kuyephambili umama utshiya ubaba endlini.

Ngelihlo lengqondo kusobala ukuthi umama nxa etshiya ubaba endlini kutsho ukuthi uyabe eseyadinga abanye obaba ngoba lo osendlini engasibaba walutho. Akuselakuhlonipha lapha emhlabeni ngoba ogogo labazukulu babonakala ezingosini bethandelene. Lokhu kutsho ukuthi ogogo sebethandana njalo baye emacansini labantu abancane abangaba ngabazukulu babo. UNomazulu, laye intombi encinyane isithandana lexhegu ngoba umuntu olezimvu ngoseluphele ngaphandle kokuba kulufuzo.

Ngaleyondlela uNcomizulu uthandana lomuntu omdala kakhulu kulaye. “UNomazul’ukuphulul’izimvu.” Umzala laye ligazi lakhe lo kodwa imbongi iyabuza ukuthi kungani esemfisela ingubo? Lapha utsho laba abangahloniphi abazawabo bethi akulandaba lanxa bethandana labo. Ngalokhu-ke okwenzakalayo imbongi ivusa ukhokho wayo ukuthi kavuke abone lokho okwenzakala khathesi njengoba wafa engakaboni.

Abantu abasahloniphi njalo kabasazili lutho sebesedlulwa zinyoni lezinyamazana ngoba imbongi ithi, “Angathi lenyoni ziyazama ukusithela.” Ngenye indlela abantu abasahloniphi legcekeni bayangena kwezocansi. Izinto seziguqukile ngoba lakwezomnotho, ezemali abantu sebehlokoza imiduli kuphume imali. Lapha imbongi itshela ukhokho wayo ngethekinoloji esikhona okusetshenziswa khona ama–ATM ukuthola imali.

Imitshina le igcwele indawana ezinengi yikho imbongi ithi, “Indawana yonk’sekungunyoni ntshantshaza.” Umuntu laye kuthiwa osefana lemitshina yonale entshantshazayo ngoba yonke indawo usehamba entshantshaza loba ngaphi okwenyanyisa imbongi yikho ibuza, “Izolo kambe bekunje?” Imbongi iphetha lesi sigaba ibuza ukhokho wayo ukuthi wafelani engakaboni?

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds