uMthunywa
Thokozile Mbedzi
ISIKOLO seNyathi High School sesiveze ukuthi uhlelo lweNational University of Science and Technology (Nust) Schools Enrichment Programme soluphathise kakhulu ekukhwezeni impumela yabafundi kuzifundo zeSayensi kanye lezeNombolo.
Kubikwa kusukela ekuqaleni kohlelo lolu impumela yesikolo lesi isikhwele yaya ku-80 phesenti kuzifundo zeSayensi kanye leNombolo.
Umphathisikolo weNyathi uMnumzana Nkululeko Zidla uthe uhlelo lolu soluphathise kakhulu abafundi ukuze baqhubekele phambili ngoba umfundi ngeke waqhubeka ngezifundo nxa engelaSayensi kanye leNombolo.
“Abafundi kanye lababalisi bayaluthakazelela uhlelo lolu kungakho abafundi sebebuya ngobunengi babo ukuze bathole izifundo lezi ngoba zisenziwa okwamaviki amabili ngekhefu lokuvalwa kwezikolo,” kuveza uMnu Zidla.
“Uhlelo lolu selwenze abafundi abanengi baba ledlabuzane lokufunda izifundo lezi ngoba kudala abanengi babezizonda njalo bezesaba bethi zinzima.
“Lokhu sekusenza lathi abaphathi ezikolo sikhululeke ngoba impumela isimihle kuzifundo zonke ezenziwa esikolo,” kutsho uMnu Zidla.
Uqhubekele phambili uMnu Zidla esithi uhlelo lolu kalukhethi abafundi luthatha bonke abayabe bephumelele ezifundweni zikaFomu 3.
UMnu Zidla uthe esikolo sakhe abafundi abaphumelela ezifundweni lezi sebefika kusilinganiso se80 phesenti okuyinto emthokozisayo kakhulu.
