uMthunywa
BATHI inkunzi ezintathu ngeke zihlale sibaya sinye, kodwa lokhu akutsho lutho kumanina amathathu athethwe yindoda eyodwa njalo alala embhedeni munye.
Isangoma uDoctor Mokoena, uyakwala ukuthi kunzima ukuhlala lamakhosikazi amathathu emkhukhwini owodwa.
Kubikwa amanina la avela esigabeni seTsakane eEkurhuleni apheka aphinde adle ndawonye phezulu kwakho konke alale embhedeni munye omkhulu.
Imuli le ihlala ndawonye labantwabayo abayisithupha.
Unkosikazi omdala uNene Ngwenya ubikele iphephandaba leDaily Sun ukuthi ekuqaleni omakhelwane babo babebona angathi bayahlanya ngokuthathwa yindoda eyodwa.
“Kodwa ngenxa yokuthi silokhu sibambene njalo sithokoza kabaselandaba lakho.”
Intatheli yeDaily Sun izibonele indlela amanina la agcina ngayo abantwababo.
“Sifana lezelamani kungakho siyancedisana. Ukubambana kwethu kuhawukelwa langabantu abaqala ukusibona,” kutsho uNene.
Unkosikazi wesithathu uMakhosi Ntuli uthe uyajabula ngendlela umyeni wabo abaphatha ngayo.
UMokoena uthe inye kuphela indlela yokwenelisa ukuphila kuhle ulesithembo:
“Nxa uthethe isithembo kumele omkakho ubaphathe ngendlela efanayo njalo ungaze waba lomunye omthanda ukwedlula abanye.
“Kumele ubalalele nxa belensolo wenze izinqumo ezifaneleyo.
“Mina kanginothanga kodwa ngiyenelisa ukujabulisa amakhosikazi ami. Sidla ndawonye okuncinyane esilakho njalo siyazama ngakho konke okusemandleni ethu ukuthi sifundise abantwabethu imfundiso le,” kutsho uMokoena.
UMokoena uthe kuminyaka emithathu edluleyo esefuna ukuthatha unkosikazi wesithathu wahlala phansi lamakhosikazi akhe wadinga imvumo yabo kanye lokuthi bayakwamukela yini lokhu.
“Ngiyawahlonipha amakhosikazi ami njalo ngiyabalalela nxa bengajabuleli izinqumo engizenzayo.”
