uMthunywa
Thokozile Mbedzi
KULENINA lakoChireya eGokwe elitshiye izakhamizi zakule indawo zitheneke amadolo kulandela ukubeletha usane qede lilungcwabe luphila esilugwini senkukhu, uMthunywa uyakuveza lokhu lamhlanje.
Inina leli, uMarita Jikinya okungasatholakalanga iminyaka yakhe yokuzalwa, udonselwe edale lenduna uChireya ngempelaviki ngemva kokuba omakhelwane bakhe bebikele ipholisa lenduna kanye losobhuku ukuba ubelethe usane qede walugqibela luphila ngoba esesaba ukuthi belungayisilo lwendoda emthetheyo.
UMthunywa uxhumane lezakhamizi zakule indawo zona eziveze ukuba zithe zidlula zabizwa ngumkaJikinya esithi unkosikazi wakhe uyakhala uthi uyagula njengabantu abadala kababuye bazombonisa umkhuhlane mhlawumbe unkosikazi wakhe setshaywe yizinto.
Ugogo uTambudzai Chikara omunye wabomakhelwane owabizwayo uthe lanxa uJikinya wazama ukuthi athi uyopha nje akulanto embi kodwa njengabantu abadala baphanga babona ukuthi uqamba amanga kungakho bamtshela ukuthi akhulume iqiniso.
“UMarita wazama ukuthi athi kabelethanga kodwa wacina eveza ukuthi uzibelethisile usane qede walugqibela luphila esilugwini senkukhu.
“Indaba le isethusile kungakho sihle sabikela ipholisa lenduna ngoba sisazi ukuthi esigabeni sakithi licala elikhulu elizondisa amadlozi endawo okwenza kucine kusenzakala izinto ezimbi ngoba umntwana omncane engcwatshelwe endaweni engayisiyo,” kuchaza ugogo uChikara.
“Into engizwise ubuhlungu yikuthi umkakhe, uMuchefa ubengazi lutho ngomthwalo ngoba uvele usezikhulele.
Kukanti kunyanga ezimbalwa ezidluleyo walwa lonkosikazi womnikazi womthwalo (kaMoyo), kubangwa indaba le kodwa wakulandula.
“Khathesi nanko-ke sephinde njalo wenza enye indaba sezibelethisile wagqibela umntwana esilugwini ephila,” kulandisa uNkszn Chikara.
Ipholisa lenduna uMnumzana Enock Chibanda uveze ukuthi esebikelwe ngodaba lolu waludlulisela kusobhuku kanye lenduna.
“Ngathi ngifika uMarita wahle wayasitshengisa lapho ayegqibele khona umntwana esilugwini senkukhu.
“Njengoba yena wayengezwa kuhle sahle samthwalela esibhedlela. Izalukazi zagebha usane zayalungwaba endaweni eqondileyo,” kutsho uMnu Chibanda.
Ebuzwa ngale indaba uNkszn Jikinya uvumile ukuthi wazibelethisa ngemva kwalokho wangcwaba usane luphila.
“Kuliqiniso sibili ukuthi ngazibelethisa ngemva kwalokho ngangcwaba umntwana ephila esilugwini senkukhu. Okwangenza ngenza lokhu yikwesaba ihlazo ngoba umthwalo ubungasi womkami kukanti lendoda eyangimithisayo ithethe njalo unkosikazi wayo ubesekwazi ukuthi ngizithwele kungakho ngibone ukuthi kuzangehlula ukuthi ngikhulise umntwana lo,” kutsho uJikinya.
“Umntwana ngambeletha ephila ngayamgqibela ngoba ngisenzela ukuthi abantu bengangiboni njalo lomkami engezwa ngendaba le,” kutsho uNkszn Jikinya.
Induna yakule indawo uChiya Chireya ibuzwa ngale indaba uthe kalamathe ngesenzo sowesifazana lesi njalo kuyaqala ukwenzakala indaba enje esigabeni lesi.
“Indaba enjalo ifikile edale kodwa kuyangethusa ukuthi umuntu wesifazane aze abelesibindi sokugqibela usane luphila. Umthetho lawo kumele uthathe indawo yawo ngoba lokhu yisifundo esibi kwamanye amanina,” kuphetha induna uChireya.
