uMthunywa
IJAHA likaDJ Zinhle uBrendon Naidoo umiswe phambi komthethwandaba esetheswa amacala amane awobuqili.
Kundaba ezivele kuNews24 isoka likaDJ lo wodumo belimiswe phambi komthethwandaba weJohannesburg ngoMvulo kuyonale iviki.
Iphephandaba leli libike ukuthi uNaidoo wabotshwa ngoMgqibelo ngakho uzabhekana lamacala obuqili.
Kusolelwa ukuthi wavula ibhizimusi yokuthengisa impahla lapho abantu abahlanyela imali eziyinkulungwane.
Wenelisa ukubaqilibezela ngokubatshengisa imifanekiso yakhe eme eduze kwemota edulayo i-Audi R8 lencwadi zakhe zebhanga, kuchaza iNews24.
Omunye wabaqiliweyo uchaze ukuthi yena wathathelwa iR900 000 ngemva kokuthi indoda le imlandile yathi imele inkampani edumileyo angeke ayiqamba ngoba bathi kabamazi.
Omunye usomabhizimusi uthe wahlanyela imali engangeR2,5 miliyoni ngomnyaka ophelileyo kodwa kazange azuze lutho.
Kubikwa elinye ibhanga eliseSandton ngemva kokuthi selilandwe ngabantu abanengi bekhala ngokuthathelwa imali zabo nguNaidoo lavala ibhuku lakhe lebhanga.
“Kwaba labantu ababili abasebenzisa ibhanga lethu abafika besithi baphe uNaidoo iR1-miliyoni ukuze abazalisele imali. Ngakho uNaidoo uyazi ukuthi ibhanga lethu alikuvumeli lokhu,” kuchaza omunye obemele ibhanga le.
Kusalindwe uZinhle ukuthi akhulume mayelana lamacala etheswa isoka lakhe. — Ubulembu
