Ithathwa njani incwadi yokufa (Death Certificate)

13 Apr, 2017 - 00:04 0 Views

uMthunywa

silo Pumulani Mpofu

INCWADI kamufi eyokufa ayithathwa nje nguye wonke umuntu. Bakhona abakhethelekileyo abalelungelo lokuthatha incwadi le. Abayibo abafanele ukuthatha incwadi le bagoqela umkamufi, izihlobo eziseduzane kanye labantwana bakamufi. Ngesizatho lesi kuqakathekile ukuthi umuntu ahlale esazi lapho okulezihlobo zakhe lezomkakhe kumbe ezabazali njalo ezwanane lazo.

Into yonke ilesikhathi sokwenzakala yikho nje uzathola leBhayibhili lalo lisithi kulesikhathi sokuzalwa, esokujabula lesokufa. Esintwini lakho kulesikhathi sokwenza izinto ezithile. Yikho nje ungeke uthole kuthiwa umuntu uyabuyiswa  ngesikhathi sezulu.

Incwadi yokufa-ke layo ilesikhathi okumele ithathwe ngaso. Kukhuthazwa ukuthi incwadi le ithathwe umuntu esanda kungcwatshwa. Lokhu kuqakathekile ngoba singahlala isikhathi eside izinto zazonakale. Kungenzeka ukuthi lowo obemele ayithathe athuthe kumbe afe. Kusuke kubenzima ebantwaneni.

Ngiyazi inengi lisalandela isintu, yikho nje uzathola abantu belindile bethi sisakhala loba basazilile mhlawumbe balinde okwenyanga ezintathu kusiya kweziyisithupha. Lokhu kuyancindezela amalungelo abantwana labafelokazi ngoba ukuswelakala kwencwadi yokufa, kutsho ukuthi okukamufi obekusiza imuli lakho kuzabe kumile okufana lepetsheni (pension). Bakithi impilo yabantwana kumele iqhubekele phambili, kungakhathalekile ukuthi kufiwe kumbe akufiwanga.

Incwadi yokufa njengencwadi yokuzalwa ithathwa emawofisini ohlangothi lukaHulumende olubona ngokwenzakala phakathi kwelizwe (Ministry of Home Affairs) njalo edume ngokuthiwa yiRegistry Office.

Umuntu uthathelwa incwadi yokufa lapho afele khona. Akuvunyelwa ukuthi umuntu ofele eGweru athathelwe incwadi yokufa ePlumtree. Amahofisi lapho okuthathwa khona incwadi yokufa akhona kuzozonke izigaba zelizwe, eHwange, eLupane, ePlumtree, eGweru, eGwanda lakoBulawayo lapho iwofisi yakhona eyaziwa ngokuthi kukoMsitheli.

Okokuqala nxa umuntu ezelwe, kuyalotshwa indawo lapho azalelwe khona lenombolo zesithupha ziyakufakaza lokhu. Inombolo lezi zifakaza ukuthi umuntu uzalelwe ngaphi. Isibonelo umuntu engaba lenombolo ezinjengalezi 29-313464 P -29. Lokhu kutsho ukuthi umuntu lo uzalelwe esabelweni seGweru njalo evela kulesosabelo.

Omunye engaba lenombolo ezifana lalezi: 08-322164 Q29. Lokhu kutsho ukuthi umuntu lo uthathele isithupha  koBulawayo kodwa yena edabuka esabelweni seGweru.

Lanxa umuntu esefile, kuyabhalwa indawo lapho afele khona kuncwadi yokufa kwakhe. Lokhu kwenzelwa ukuthi uHulumende agcine ingwalo eziqondileyo ngokuthi abantu bazalelwe ngaphi njalo bafele ngaphi. Okokucina kodwa lakho okuyisiqokoqela njalo yikuhamba uthwele i-burial order njalo izihlobo lezo kumele zichaze ubuhlobo bazo zisebenzisa incwadi zabo zokuzalwa kanye lezithupha.

Ngithemba sonke kusuka lamuhla sizaphanga sithathe incwadi zokufa zezihlobo zethu eziyabe zithe zatshona.
Asihlanganeni njalo kuviki ezayo.

Umlobi uthinteka kukheli ethi [email protected]  lakunombolo zocingo ezithi 0773195055 loba kuFacebook ethi Trinity Project PVO.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds