uMthunywa
Ncekwenhle Ncube
INGCITSHI kwezokulima zikhuthaza abalimi ukuthi bavikele isivuno sabo kumpehlane ukuze kungehlisi isivuno sabo salonyaka esikhanya sisihle.
Ekhuluma lentatheli kaMthunywa umlimisi weAgritex uMnumzana Thabani Ndlovu uxwayise abalimi ukuthi basebenzise imithi abayiphiweyo ukuze bavikele izilimo zabo kumpehlane.
“Abalimi sibakhuthaza ukuthi bananzelele izilimo zabo zingadliwa yimpehlane lezinye izibungu ezingenza isivuno sabo sehle.
“Sikhuthaza abalimi ukuthi behlole phose malanga onke ukuthi izilimo zabo azikatshengisi ukuthi sezidliwa lapho abazigcine khona. Kunjalo nje sibakhuthaza ukuthi befake imithi egoqela i-chirundamatura kanye lomlotha,” kutsho uMnu Ndlovu.
“Abalimi kumele njalo bananzelele ukuthi nxa befaka umuthi bayahlanganisa yonke indawo ukuze kungabi khona indawo ezisala zingafinyelelwanga ngumuthi ngoba kulezondawo yikho lapho okuqala khona ukudliwa zimpehlane.
“Lonyaka asifisi ukuthi kube khona isivuno esizalahleka mahlayana nje. Kuyikho sikhuthaza abalimi ukuthi bavikele isivuno sabo kungakabi lomonakalo.”
UMnu Ndlovu ubuye njalo wakhuthaza abalimi ukuthi belungise iziphala ezifaneleyo ezingasoze zidilike kubuye kudale indlala elizweni ngemva kwesivuno esihle salonyaka.
Intatheli ixhumane lomunye umlimi osuka esigabeni seMatopo, uMnumzana Philani Nkomo ochaze ukuthi impehlane yande ukubathwalisa nzima phose minyaka yonke okwenza ukudla abakutholileyo kungenelisi ukufikisa isivuno somnyaka olandelayo.
“Impehlane kusazibungwana ezingathi zimnyama okuqala ngokudla inhliziyo zomumbu. Iqala ukudla ngaphansi kwengalani kuthi sekuvumbuluka isivuno sesiphelile.
“Kubanzima ukuthi ukunanzelele ngesikhathi. Thina sesisenza okokuthi minyaka yonke sihle sivuvuzele umlotha esiphaleni andubana sifake isivuno zethu.
“Kuyasiza noma nje impehlane le isiba khona ngemva kwesikhathi,” kuchaza uMnu Nkomo
Lonyaka isivuno sikhanya sisihle kakhulu okuvele ukuthi abalimi abanengi bazenelisa ukuzuza okwanele imuli zabo baphinde bahambise esinye isivuno esiphaleni sesizwe.
