uMthunywa
YiNtatheli kaMthunywa
IZAKHAMIZI zeMutapa ilokitshi leGweru zinathisana itiye ngesiga sesalukazi okubikwa sikhithike kukhomane sinqunu sivela emoyeni izolo ekuseni andubana sibikele abantu abakade belapho ukuthi sivela eLower Gwelo.
UMthunywa uzwe ukuba abantu belokitshini leli bavuswe yisiwowowo ebesesikhona phandle ngemva kokuba labo akade besiya emsebenzini ekuseni bebone isalukazi lesi ebesibhunyumunyu sime mpo sesizama ukudinga ukuthi sicatshe.
UNkosazana Regina Ncube obekhona lokhu kusenzakala uthe bavuswe ngumsindo obusuphandle abantu bebabaza umhlola akade bewubona phambi kwabo.
“Sivuswe ngumsindo obuvelela egcekeni lapho okudlalelwa khona ibhola sahle saqonda khona.
“Lusitshaye lwaseqa uvalo sibona isalukazi sigqoke isudu yaso yokuzalwa njalo sigaxe okulilenjana okuluhlaza okulokumhlophe,” kutsho uNkszn Ncube.
Uqhubekele phambili wathi isalukazi lesi siyaziwa elokitshini leli kodwa sibamangalisile sesisithi silahleke sivela koSogwala.
“Isalukazi lesi siyasazi sihlala khonapha lomntanaso. Asazi ukuthi kuyini okusenze saphuma phandle singagqokanga saya egcekeni lenguqu.
“Okunye okusimangalisileyo yikuthi sibuzwa besisithi sivela koSogwala njalo kasazi ukuthi sifike njani egcekeni leli,” kutsho uNkszn Ncube.
Esinye njalo isakhamuzi sakulelilokitshi esikhulume loMthunywa esingathandanga ukuqanjwa ngebizo sithe kulabesonto entsha okuthiwa yiTerbanacle Church akade bekhona lokhu kusenzakala kungakho bahle bathi isalukazi lesi singumthakathi njalo sikhithike ekhomaneni.
“Ngesikhathi konke lokhu kusenzakala bekulabenkonzo yeTerbanacle Church egcekeni abakade bekhuleka kilo okubangele ukuthi bathi isalukazi lesi singumthakathi njalo besiphapha ngokhomane sivela koSogwala, eLower Gwelo.
“Abantu besebesizwela isalukazi lesi ngoba abanye bebesithi bayasazi njalo kasiphilanga engqondweni,” kutsho lumfakazi.
UMnumzana Caiphas Shoko ohlala kulelilokitshi uthe okwenzakale izolo (NgoLwesithathu) ekuseni kulusizi sibili ngoba ugogo lo abamethesa icala lobuthakathi kaphilanga engqondweni.
“Lokhu okukhulunywa ngabantu ngamanga sibili angazi ukuthi bakuthatha ngaphi. Ugogo lo ubedingwa ngabemuli, ucatshe ngoLwesihlanu ngeviki ephelileyo. Kaphilanga engqondweni kungakho-ke akumelanga abantu bacabangele okwabo,” kutsho uMnu Shoko.
Uqhubekele phambili wathi abenkonzo kubikwa yibo abahle bathi ugogo lo ngumthakathi into athi ayisilo qiniso.
“Kulabenkonzo evulwe khathesi elokitshini lethu ngibona angani baphambanisa ukuphila kwabantu ngesiphurofethi sabo ngoba sokulabantu abanengi asebebakhombe ngobuthakathi ikakhulu abantu abaphumelelayo elokitshini kanye lasebekhulile.
“Angazi ukuthi bakwenza njani kodwa thina njengabantu balapha sithi akulunganga ukwethesa abantu abazigulelayo umlandu wobuthakathi,” kuphetha uMnu Shoko.
Imizamo yokukhuluma lesikhulumi samapholisa enkabazwe yehlule. Kusenjalo elinye ipholisa elisebenzela enkambeni yamapholisa eGweru elingathandanga ukuqanjwa ngebizo livumile ukuthi kulendaba enjalo eyenzakeleyo kodwa laselisithi intatheli kumele ikhulume lesikhulumi samapholisa.
