uMthunywa
YiNtatheli kaMthunywa
LA ngamazwi kaErol Akbay umqeqetshi weHighlanders obika ukuba abafana bakhe bazakhweza igiya kumdlalo wabo leFC Platinum kunkezo kazibuse ngeSonto emini eMagumeni.
Umdlalo lo ngomunye owehlandla lama-semi final enkezo kazibuse edlalwa minyaka yonke kuthakazelelwa ukuzibusa kwabansundu kuleli.
Komunye umdlalo, iDynamos izadlala leCaps United esigodlweni.
UMthunywa uvakatshele iBosso ngesikhathi ilolonga kwenye inkundla koBulawayo lapho uAkbay abonakale esadalala labadlali kulungiselelwa umdlalo lo odibanisa amaqembu asedlale wonke kathathu kulumnyaka.
Kumidlalo yonke iHighlanders isinqobe izimbamgodi zePlatinum, okuyikhona okwenza umqeqetshi weBosso azitshele ukuthi uzazigenqula izethekeli zabo.
“Siphezulu kwamalungiselelo omdlalo. Ngiyazi ukuthi inengi labasekeli bethu liyasola ikakhulu nxa likhangele indlela esidlale ngayo ngeSonto kumdlalo wethu weligi leShabanie. Senza amaphutha sibili, lami ngiyavuma kodwa okwenzakala ngomdlalo owodwa akusoke kuphinde futhi,” kutsho umqeqetshi lo kungxoxo encinyane ayinikeze iphephandaba likazulu, anduba agijimele enkundleni yokulolonga.
Umqeqetshi lo uhlangana lomqeqetshi weFC Platinum uNorman Mapeza eziqhenya ngokuthi iHighlanders yanqoba 3-0 mhla bedibene kumkhankaso wenkezo
UMapeza, ebuzwa ngamalungiselelo akhe, umane wala ukuthi iBosso ingaphinda umphehlo.
“Akulula ukulanda iqembu enkundleni yayo ulinqobe. IHighlanders sesiyivakatshele kanengi eBarbourfields kusehlula ukuthi siyinqobe. Ngibona angathi kuzayehlela kithi kulumdlalo.”
Umdlali kaMapeza omutsha eqenjini lakhe uGift Mbweti okwakumele aze kuHighlanders kulisizini ubike ukuba uzenza okungcono.
Umdlali weBosso okhanya eledlabuzane kulisizini uBukhosi “Khosera” Ncube uthe akaboni iqembu lakhe lisehluleka ukufika ku-final yenkezo.
“Sizafika kunkezo le ngenkani. Sonke njengabadlali sizimisele ukuthi sidlale ngokupheleleyo.”
