Uncategorized

ISIHLUKU SAMAPOSTOLI! . . . asonta egaxe inyoka esihlahleni

06 Apr, 2017 - 00:04 0 Views
ISIHLUKU SAMAPOSTOLI! . . . asonta egaxe inyoka esihlahleni

uMthunywa

Cornelius Luphahla
ZIKHALA ezimathonsi izakhamizi zelokitshini leNkulumane 12 ngenxa yamaPostoli akule indawo okubikwa lapho akhonzela khona kubonakala inkukhu lembuzi ezibhotshozwe amehlo zintula leganga kanye lenyoka ezibotshelwe ezihlahleni.

Linkemenkeme kubikwa isilesikhathi isenzakala njalo izakhamizi zakule indawo zikhathazekile ngezenzo zalababantu. Isiga lesi kubikwa sokulesikhathi sisenzakala okudala ukuthi izakhamizi zicabangele ukuthi amaPostoli la kulokuganga okuthize akwenzayo nanko phela athembisa izakhamizi ukuthi zingakhonona ngakho zizalahlekelwa zimpilo zazo.

UMthunywa uvakatshele kule indawo wakhulumisana loNkosazana Loveness Dube wathi izifuyo lezi ezibonakala ngemva kokukhonza kwamaPostoli la egangeni elikule indawo ziyabe zembeswe amalembu amnyama njalo ziyabe sezintula zingasaboni ngemva kokubhotshozwa amehlo ngensungulo ngamaPostoli ethi yindlela yokulahlisa umnyama.

“Kangilankani ngesenzo sabantu laba bathi bakhonza uThixo kodwa benza ulunya ngokulimaza izinyamazana zakhe bazitshiye ziphakathi kobuhlungu.

“Asazi ukuthi yikukhonza bani lokhu kodwa into abayenzayo ayilunganga. Bathi ngokubhoboza amehlo enkukhu kumbe imbuzi besebeyekela intula leganga bayabe belahla inhlupheko zakho, ukukulahlisa umnyama lemimoya emibi.

“Okubuhlungu yikuthi izifuyo lezi zifa kabuhlungu ngenxa yendlala kanye lokufuthelwa kodwa bona kabazizweli, bangazibhoboza kanjalo bayafulathela bazitshiye zizula ngeganga zize zicine zisifa,’’ kutsho uNkszn Dube.

Ekhuluma lentatheli uMnumzana Jerald Moyo oyisakhamuzi sakule indawo uthe udidekile ngesenzo samaPostoli la wathi udaniswa yikuthi inyoka bazibamba njani njengoba zitholakala zilengisiwe ziphila.

“Mina lokhe ngiphelelwe ngesenzo samaPostoli la esokubamba inyoka iphila bayibophele esihlahleni. Ngikhuluma nje mina ngayibona ilengisiwe esihlahleni iphila ngapho bekhonza eduzane layo. Asazi ukuthi njengoba inyoka iluma kangaka bona bayiphani ukuze ingabalumi.

“Abanye bathi ungadlula egangeni leli ngemva kokukhonza kwabo uyahlangana lenkukhu kumbe imbuzi izulazula ingaselamehlo esebhotshozwe abhotshozwa ngamaPostoli la.

“Ekuqaliseni ngangisizwa ngabantu ukuthi sebekhonza bebophele inyoka ezihlahleni amaPostoli ngingakholwa kodwa ngemva kokuzibonela kwami ngaphelelwa. Okunye njalo amaPostoli la agebha amagodi amakhulu okuyikho abagqibela khona izifuyo lezi ziphila,’’ kutsho uMnu Moyo.

Omunye wezakhamizi ezilamasimu kule indawo oziveze ngokuthi nguMaDewa uthe usehlalela evalweni ngoba amaPostoli la asekhonzela emasimini akhe athi engathinta indiwo zawo uzazibonela.

“Mina sengihlalela evalweni ngenxa yamaPostoli la ngoba abuya azokhonzela phakathi kwamasimu ami abulalela indiwo zawo phakathi abasa lomlilo ngathi ngiwabuza athi ngingathinta imithandazo yawo ngizazibonela.

Ngikhuluma nje ngahle ngangasasondeli khonapho ngoba ngiyesaba ukuthi angangilimaza sibili,” kutsho uNkszn Dewa.

UMnumzana Decent Ndlovu onguMqondisi wenhlanganiso ekhangela ngezemvelo i-Environmental Management Agency uthe ubengakayizwa indaba le wathi uzahlolisisa ukuze ikungagugudeki umhlabathi.

“Indaba yezakhamizi eziguguda umhlabathi egangeni leNkulumane 12 besingakayizwa ngakho sizahlolisisa ukuze sibone ukuthi kwenzakalani sikulungisise,” kutsho uMnu Ndlovu.

USodolobho wakoBulawayo uMnumzana Martin Moyo ebuzwa ngale indaba uthe ubengakayizwa njalo basazoyilungisisa ngoba kufanele amabandla abesegcekeni hatshi egangeni.

“Indaba enjalo besingakayizwa ngakho sisazoyilungisisa ngoba akufanelanga ukuthi abantu bahlukumeze izifuyo egangeni njalo kufanele bakhonzele emabandleni akhiwe ngokusemthethweni,” kuphetha uMnu Moyo.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds