uMthunywa
Thokozile Mbedzi
ABE-ENVIRONMENTAL Management Agency (EMA) baqhuba umkhankaso wokufundisa abatsha ezikolo ngokuqakatheka kokulondoloza izihlahla ngoba beyibo abakhokheli bakusasa.
UProvincial Environment Manager koBulawayo uMnumzana Decent Ndlovu uveze ukuthi umkhankaso wokufundisa abatsha ngokuqakatheka kokuhlanyela izihlahla bawenza ngaphansi kwendikimba ethi, “Kuqala ngawe njalo kuqala ngathi sonke.”
Umkhankaso lo uqhutshwe esikolo seCoghlan Primary lapho obekubuthene abantwana abavela kuzikolo ezitshiyeneyo kumaviki amabili edluleyo.
I-EMA ihlose ukuthi isikolo sinye ngasinye koBulawayo siphiwe izihlahla ezingu-2 500 okumele sizihlanyele.
UMnu Ndlovu uthe njengenhlanganiso bafisa ukuthi abatsha bakhule lolwazi lolu ngoba ivele ikhula lamanono ayo.
“Thina abe-EMA sindawonye lamanye amankampani abalisa iTreger, Nyaradzo kanye lalo lolu ugatsha lwezemfundo sesisungule uhlelo lokufundisa abatsha siqalisela kubafundi bePrimary ngokuqakatheka kwemvelo kanye lokuthi izihlahla ziyimpilo.
UMnu Ndlovu uthe nxa kuhlanyelwa isihlahla kumele kugejwe igodi libe yi-square loba i-triangle ukwenzela ukuthi impande zisabalale isihlahla sithole ukudla lamanzi.
“Okwenza sithi isihlahla nxa sihlanyelwa kumele sigejelwe igodi eliyi-square loba i-triangle yikuthi sifuna siqine singawi nxa kungaba lomoya omkhulu ngoba nxa igodi liyisigombolozi impande lazo ziyagoqana zingasabalali isihlahla siyawa njalo asikhuli kuhle ngoba impande ziyabe zingakutholi ukudla.
“Inhlabathi eyabe igejwe egodini ingeyaphezulu yiyo okumele iqale ukuthelwa phansi egodini ngoba ilokudla ukwenzela ukuthi isihlahla sikuthole,” kulandisa uMnu Ndlovu.
Obemele inkampani yeNyaradzo uNkosazana Vimbai Dengedza onguSales Representative uthe inkampani yabo iyalusekela uhlelo lokuhlanyelwa kwezihlahla yikho benika imuli zonke ezisebenzelana labo isihlahla.
“Inkampani yethu ipha isihlahla kulabo abathe batshiywa yisihlobo sabo ukuba bahlanyele isihlahla ukwenzela ukuthi uzulu abone ukuthi izihlahla ziyimpilo njalo ziqakathekile,” kuphetha uNkszn Dengedza.
