uMthunywa
Imbongi nguDedani Moyo
Isihloko senkondlo – Mam’omncane
INKONDLO le ngesiyiqale ngeviki ephelileyo lapho esibona khona umntwana okhala ngohlupho asebhekane lalo ngoba uyise esethethe unina omncane. Uyakhala-ke lumntwana ngonina omncane, yikho silesihloko esithi, “Mam’omncane”.
Sikhulu isililo somntwana lo ngoba uyise laye owaqala angathi uyamzwela emnceda emezela izinto kaselawo amandla. Umntwana usitshela ukuthi uyise ekhona loba engekho kujinga kufanane ngoba unina omncane uyamhlukuluza kuphela kungabindaba zalutho ngoba uyise uyazithulela. “Ngihlukuluzwa uthung’owakho.” Imzwela usizi ingane le uyise ngoba nxa engazama ukukhuluma ekhuza unina omncane, uyise uthenjiswa ukutshiywa yedwa.
Nxa esetshelwe njalo uyise uhle azithulele avale owakhe umlomo.
Kakumphathi kuhle ukutshiywa yedwa uyise kwalingane yikho ebona kungcono ukuthi azithulele yena umntnakhe ehlukuluzwa. Uphakathi kobunzima obukhulu lo umntwana ngoba useze ebuza ukuthi koze kuthini ephakathi kwalobo bunzima. Uyabuza umntwana ukuthi koze kubenini esidla ngokuphembela okutsho ukuthi kaphiwa ukudla kodwa udla khona ukunukelela kwalokho kudla. Uyabuzake umntwana ukuthi koze kubenini engatholi ukudla esizwa kunukelela?
Indlala leyo ayephakathi kwayo wayeyehlisa ngenhlamba ezesabekayo okuthi nxa uzizwa zitshwaqisa umzimba.
Wayethethiswa ngenhlamba ezimbi okungathi wayesehlisa ukudla kanti wayengadli lutho ephakathi kwendlala.
Usehlupheke kakhulu lumntwana useze efika ekuvaleliseni unina omncane lowo ethi kasale kuhle emzini wakhe kungcono adubeke ehamba kulokuhlala lapho. Lanxa evalelisa lumntwana kayisikho ukuthi uyathanda ukusuka kodwa yikho abona kungcono njalo ngamazwi la ufuna ukuzwisa unina omncane ubuhlungu.
Esesukile ekhaya lumntwana kayisikho ukuthi usehlezi kuhle ngoba uthi usesezitaladeni. Usephila impilo yezitaladeni, usesidla ukudla okulahlwe ngabanye ngoba kungafanelanga ukudliwa ngumuntu. Yena kalakho ukukhetha ngoba engabulawa yindlala. Kalakho okwakhe udla khonokho ahlangana lakho ezitaladeni. Kaselakugeza okuhle lumntwana ngoba uphila ezitaladeni lapho atshona ehamba eginqa sekungathi lawomaginqo yiwo ageza ngawo.
Ekulaleni lakho kulobunzima ngoba kalazo ingubo njalo lendlu yokulala kalayo yikho ethi, “Ngilala ngembethi isibhakabhaka.” Konke lokhu lumntwana uthi kungenxa yakhe unina omncane. Ngensuku ezadlulayo unina omzalayo esamgezisa ibala lakhe lalimpofu libutshelezi, kodwa lamhlanje usenguxamu okutsho ukuthi kasagezi, ingcekeza isiluqweqe emzimbeni wakhe. Ngamanye amazwi umntwana lo utsho ukuthi ijwabu lakhe seliyisihwalahwala seligcwele amaxolo njengelikaxamu.
Izigqoko zokutshintsha kaselazo nanku phela uthi “isigqok’engisigqokileyo Angiz’ukusikhupha Kodwa sizazikhithikela ngeziqetshana Size siziphelele.” Ye, vele kunjalo umuntu nxa engatshintshi isigqoko asigqokileyo kuyenzeka ziguge sibeyiziqetshana size siphele. Bakhona abazamayo ukumnika ukudla lumntwana kodwa yikuthi lokho okokuphiwa ngozwelo kakweneli. Uyasivezela lumntwana ukuthi insuku kazifanani okutsho ukuthi kwamanye amalanga kakutholi lokho kudla.
