uMthunywa
Silo C Dube kugwalo
SIBONILE ukuthi uMaThabo uyizwisisa ngcono ipolitiki kulo Sipatalala oyikhulumayo kodwa etshengisa ubuchopho obungajiyanga. USipatalala ungomunye wabantu abakholwa ukuthi amakhiwa angcono kulabantu abamnyama.
Ingqondo yakhe imfitshane ngoba usebenza ukusola abantu bakibo ethi bayaloya njalo bathembelana izinto engavezi ububi babelungu labo angabaziyo.
Kungasenani uSipatalala ukhanya uyasuthiseka ngempendulo kaMaThabo emsola kakhulu ngokuchothoza isizwe sakwabo ebuka abelungu. Uzahlekise abanye ebuza ukuthi kungani uMaThabo engangeni kupolitiki bamvotele?
UMpumelelo laye imqumbaqumbile impendulo kaMaThabo ayiphe uSipatalala aze athi laye engamupha elakhe ivoti nxa elifuna aphinde athi vele uselalo. UMpumelelo ubuza uMaThabo ukuthi yena engabe ufuna siphi isikhundla?
Esikamongameli kumbe esobusenetha? Usinika omunye umbono ngepolitiki. Uthi izikhundla lezi zidinga abantu abaphiweyo emlonyeni. Uyabuza njalo uMpumelelo ethi kabazi kumbe lezenzweni uphiwe uMaThabo njengoba izenzo kungemazwi. Uthi bengazisola sebemvotele engasabananzi. Ngalokhu uMpumelelo usinika okwenzakalayo kupolitiki okuthi abantu bengavotelwa basuka bahambe kokuphela njalo bekhohlwe labo bantu ababavoteleyo.
UMaThabo ubatshela ukuthi bengamfiseli lokho okwepolitiki ngoba yena uthi ufuna okwekilasini ethuthukisa abantwana. Wathi ubizwa asabele kulokho. UNdabeni laye uletha umbono ngepolitiki ethi abantu ababakhokhelayo abazalwa bezinkokheli. Uthi ungananzelelisa uthi uzabona ukuthi inengi lenkokheli zabo lalifundisa ezikolo, emakolitshini lemayunivesithi bengakangeni kupolitiki. Uqhubeka ethi njengoba bezibonela labo, bengacindezelwa muntu kumbe ini, benza amalungiselelo okuyangena kwezombangazwe.
UNdabeni ubuza uMaThabo ukuthi kambe ufuna ukuze ayekufa elokhu edlala labantwana? Uyaphambili ethi ingqondo kaMaThabo izacina isifana leyabantwana. UNdabeni lapha uveza iqiniso elikhona ngabezombangazwe.
Inengi labo lalingababalisi basuka bangena kwezombangazwe. UNdabeni uthi bona bazimisele ukubamba isibhakabhaka okutsho ukuthi bafuna ukuthuthuka lakupolitiki bengangena njalo.
Ngingazi ukuthi kambe ukufundisa abantwana kulicala yini njengoba sekuthiwa batshona bedlala labantwana.
Njengokwenzakala khathesi siyabona ukuthi ababalisi abanengi abawuthakazeleli umsebenzi wabo bethi iholo lakhona kalibasuthisi. Kuhlezi kulokukhonona ngomsebenzi ezindlini zokusebenzela ezababalisi. UMpumelelo kuyamangalisa ukuthi kanti loNdabeni laye usengusopolitiki. Banjalo ababalisi abanengi kulezinsuku abakhuluma kakhulu ngezombangazwe engxongxweni zabo. Kuhle kumbe hatshi, ngingezake ngikutsho lapha kodwa abafundi yibo abangatsho imbono yabo kulokhu.
Kuqakathekile ukuthi abafundi baxoxe ngalokho okwenzakalayo elizweni labo. Ngokuhambelana kwezinto, njengoba ilizwe likhangelane lokhetho ngomnyaka ozayo, uSipatalala uzwakala ebuza ukuthi kungani umdlalo wabo ungagxili kukhetho olukhuthaza ukuthula ledemokilasi? Kuhle kakhulu ukuzwa abantu bekhuluma ngokuthula ledemokilasi kwezokhetho. Le yimfundiso enhle kakhulu okokuthi abafundi labo bangakuthatha kubeyinkuthazo enhle ebantwini.
Abantu kumele bakhuthazwe ukugcina ukuthula lokuziphatha kuhle ngezikhathi zokhetho. Abantu abaphiwe ithuba lokukhetha labo ababafunayo kulokuzinza lokuthula hatshi ubudlwangudlwangu uthole abantu bengasahlalisekanga.
