uMthunywa
Ncekwenhle Ncube
KUMKHOSI wokubuka amasimu oqhutshwe ngoLwesihlanu kuviki edluleyo, uMnumzana Kalani “Mjayeli” Ndlovu uncome kakhulu uHulumende ngokubaphathisa njengabalimi ngemfanelo zokulima.
Ekhuluma ngethuba lokubuka umumbu ensimini yakhe eyaziwa kakhulu ngokuthi kuseMjayeli Farm, uMnu Ndlovu ubonge uHulumende ngokusungula uhlelo lweCommand Agriculture esithi luzaphathisa ukuletha ukudla esiphaleni selizwe.
“UHulumende ungiphe ulwazi olungivule ingqondo. Bengingazi ukuthi lami kolunye usuku ngingazithola ngilima ukuze isizwe sizuze ukudla, kodwa ngokuphathiswa nguHulumende ngikwenzile lonyaka.
“Imvundiso, inhlanyelo kanye lemithi yokubulala izibungu usiphile njengabalimi mahala. Konke lokhu yinto enhle okumele siyibonge.
“Kunjalo nje abalimisi siyabaphiwa mahala kusukela siqala ukulima size siyevuma, asibabhadali kodwa uHulumende uyasipha,” kulandisa uMnu Ndlovu.
“Ngomnyaka ophelileyo ngizuze umumbu ongamathani amane kanye lamabele angamathani amathathu lengxenye ngoba bengizilimela okwami ngedwa. Kodwa lonyaka ngokuphathiswa nguHulumende ngikhangelele amathani afika i-100 ngqe nxa ngehlulekile ngangcono ngibekumathani angu-80,” kuchaza uMnu Ndlovu.
Uqhubekele phambili esithi ngabe iCommand Agriculture le yaqala kudala ngabe ilizwe leli likhatshana kakhulu ngempucuko ngoba abantu bayasutha njalo bezuza lokudla kokuthengisela ngaphandle kwelizwe.
Ubuye njalo wakhuthaza abalimi ukuthi bengahlali phezulu kwezandla belinde ukuthi uHulumende abuye kibo ukuzobancenga ukuthi balime kodwa kumele bona badinge usizo ukuze isizwe sivuke sithole ukudla kanye lemali yangaphandle kwelizwe.
Abalimi ababenxusiwe kulo umkhosi bakhanye bewuthakazelela umsebenzi owenziwe kule insimu njalo inengi labo belifisa ukuzwisisa indlela abasebenzisa ngayo uhlelo lweCommand Agriculture ukuziphathisa.
Intatheli ixoxisane loNkosikazi Sakheleni Mkandla ongumlimi eFilabusi ochaze ukuthi uyafisa ukuphatheka kuhlelo lukaHulumende lolu ukuze laye enelise ukulimela isizwe.
“Ngiyafisa ukuba yingxenye yohlelo lolu. Esikhathini esinengi bengicabanga ukuthi kulenkethabetshabi ekuphiweni abantu.
“Ngizuze ithuba elihle lokuchazelwa ngalo lamuhla,” kutsho uNkkz Mkandla.
Emkhosini lo bekubuthene abalimi abanengi ababevela endaweni ezehlukeneyo kanye labalimisi bendawo ezitshiyeneyo ukuzothakazelela usuku lokubuka insimu yomlimi owenze kuhle.
