uMthunywa
YiNtatheli kaMthunywa
UPRINCE Dube wathi ekhuluma loMthunywa ngesizini edluleyo wabika ukuthi ngo2017 uzatshengisa abalandeli ukuthi yena unyawo lwakhe luyababa.
UDube osengumgadli osethenjiwe kwezikaMagebhula uthembisa ukuthela amabhola amanengi emambuleni kulisizini. Uqale ngokwenza lokhu kumdlalo wokuvula isizini mhla iBosso inqoba omakhelwane iBulawayo City nge-2-0 eMagumeni. UDube wahlohla elakuqala kulumdlalo.
Umdlali lo usevule amehlo abalandeli benguqu abafuna ukufakaza ukuthi uDube loRoderick Mutuma bazaligiqa kanjani bobabili phambili kwegedi. Enkambeni yabalandeli beBosso kulethemba lokuthi iqembu labo lizaphetha liyingqwele kumidlalo yeligi ka2017.
UDube uzakhunjulwa ngokuza kwakhe kuBosso ngesizini edluleyo iqembu lidlala leDynamos, ngokuhlohla kuhlandla lakuqala ngemva kwemizuzu engu-57.
Umdlali lo wenza imbali ngokuqeda isiqalekiso seHighlanders sokudliwa yiDeMbare okweminyaka elitshumi. IBosso yayicine ukunqoba iDynamos ngo2006.
Kuliviki iphephandaba likazulu lixhumane lomdlali lo othe lonyaka uzaphinda akwenza nyakenye.
“Ngifuna ukuhlohla amabhola amanengi. Iqembu lethu lidinga abadlali abahlohlayo ngakho ngisebenzela ukuthi ngikwenze lokhu. Ngibonga abanye bami engidlala labo ngokunginikeza ithuba lokuthola amabhola amahle phambili,” kutsho uDube.
Ubike ukuba kuyisifiso sakhe ukuthi adlale kuhle labanye ukuze iqembu lithole imiklomelo.
“Okuqakathekileyo yikuthi ngingazikhukhumezi ngoba ukuhlohla kwami yikunqoba kweqembu njalo. Ngilungiselela imidlalo yonke ngincediswa ngabanye abadlali,” kutsho umdlali lo ngoLwesibili ngesikhathi iHighlanders ilungiselela umdlalo ophakathi kweBosso leShabanie ozadlalwa ngeSonto.
UDube ungena kulumdlalo esazi ukuba kudingeka ukuthi ahlohle.
Imidlalo yeCastle PSL kulimpelaviki:
NgoLwesihlanu: Yadah v ZPC Kariba (National Sports Stadium); NgoMgqibelo: Bulawayo City v Chicken Inn (Barbourfields), FC Platinum v Bantu Rovers (Maglas), Black Rhinos v Chapungu (NSS), How Mine Tsholotsho (Luveve)
NgeSonto: Highlanders v Shabanie (Barbourfields), CAPS United v Harare City (National Sport Stadium),Triangle v Dynamos (Gibbo), Hwange v Ngezi Platinum (Colliery)
