uMthunywa
Ncekwenhle Ncube
AMABHAYIBHILI ake abekwa eceleni ngesikhathi amanina amabili ebandla leJerusalem Pentecostal esigabeni seMpisini eSigodini egwazana esontweni kubangwa umfundisi, uMthunywa ukuzwile lokhu.
Isiphithiphithi lesi senzakale ngoLwesihlanu kuviki ephelileyo lapho uNkosikazi Pertunia Nkomo (41) ongomkhulu webandla kwezomthandazo agwazwe khona ngezenge nguNkosazana Lebohang Ndlovu (27) ngemva kokumthola evalelene lomfundisi uSteward Ngwenya (39) ewofisini yakhe selisiya ngomtsha wendoda.
Umfakazi oqotho olilunga lebandla leli ongathandanga ukubethwa ngegama uchazele iphephandaba ukuthi uNkkz Nkomo wafika esontweni esiyathanyela kodwa inhliziyo yamthuma ukuthi ayeqaza umfundisi ewofisini okwenza wamthola ecabujana loNkszn Ndlovu.
“UNkkz Nkomo wahamba esiyathanyela enkonzweni kodwa wathi efika wabona imota kamfundisi ikhona wasesithi ayembingelela. Kukhanya wathi efika wavula isivalo engaqoqodanga wathola umfundisi loLebohang bethandelene.
“Baqala ukutshingelana baze babambana ngezandla. Umfundisi wazama ukubalamula kodwa wehluleka okwenza wabaleka wabatshiya bebambane ngemphimbo.
“ULebohang wathi sebona sekhulelwa wadobha izenge elaliphambili kwehofisi kamfundisi wagwaza ngalo uNkomo esiswini kabili laphezulu kwelihlo.
“Kwanceda abanye abafana ababevela dinga inkomo abayibo abafika babukela kancane balamula sebebona uNkkz Nkomo sesopha. UNdlovu yena wahle wacela ezinyaweni lalamuhla lokhu akwaziwa ukuthi wayangaphi,” kutsho umfakazi lo ongathandanga ukuqanjwa.
Indaba le kubikwa kayisabikwanga emapholiseni ngoba abadala bebandla bayinyathezela phansi.
Intatheli izwe ukuthi umfundisi kazange alugxobe ngeSonto enkonzweni okungabe kubangelwa yikuthi ulenhloni ngehlazo elenzakeleyo.
Abasiki bebunda babike ukuthi okwenza umsindo lo wamemetheka kwagcwala abantu abanengi yikuthi uNkkz Nkomo wadonsa uNkszn Ndlovu ngewigi wayikhupha.
UNkkz Nkomo ebuzwa ngaloludaba uthe kuliqiniso ukuthi balwa loNdlovu kodwa babengabangi umfundisi.
“Kwaba lokungazwisisani leyinye intombazana yebandla lethu kodwa ke ngamanga abantu ukuthi besibanga umfundisi.
“Ngangizama ukumkhuza mayelana lendlela aziphatha ngayo njengomuntu omutsha wasezama ukuthi avuse ikhanda sasesisilwa. Lokhu okunye angikwazi,” kuveza uNkkz Nkomo.
Imizamo yokukhulumisana lomfundisi yehlule ngoba esemhlanganweni kwaze kwafika isikhathi sokudindwa kwephephandaba.
