uMthunywa
IPIKA igqoke ezayo indoda esileminyaka eyisitshiyagalombili ilwisana lomkhuhlane wokuvuvuka kwesitho somzimba nanko phela odokotela kunye labosiyazi badidekile ngokuthi inga uvela ngaphi lumkhuhlane lokuthi bangayisiza njani.
USbusiso Msomi oleminyaka yokuzalwa engu-33 ohlala eBhemela ePort Shepstone kwele South Africa uthe ukuvuvuka kombala wakhe kunye lomlenze kwaqala kuyisilonda esincinyane kuminyaka eyisitshigalolunye edluleyo lamhla sokubangele ukuthi abelonyawo angathi ngolwendlovu.
Uthe umlenze kanye lombala wakhe sokukhathaze abanengi ngoba odokotela labosiyazi labo bayehluleka ukumelapha.
“Sengiphelelewe ngamasu ngomlenze kanye lombala ovuvuka usiya phambili ngokuya kweminyaka. Sengazama imithi yesintu kanye leyesikhiwa kodwa akulabubelo,” kutsho uSbusiso.
Uthe umkhuhlane lo usumtshiye ekhubazekile njalo kasenelisi ukwenza izinto ezinengi.
Wengezelele wathi kwabanzima kuye ukutshiya umsebenzi ngenxa yomkhuhlane lo ngomnyaka ka 2013.
“Lalamuhla kangisebenzi sengileminyaka engu-8 ngizihlalele. Umkhuhlane lo ungitshiye ngikhubazekile njalo yiwo owangenza ngatshiya umsebenzi ngomnyaka ka 2013.
“Ngithembele ebazalini bami ukuthi bangiphathise ngokudla lokunye okutshiyeneyo okufunakalayo empilweni. Lokhu kungizwisa ubuhlungu ngoba esikhundleni sokuthi ngibe yimi enginakekela abazali bona yibo asebenginakekela mina lengane yami,” kutsho uMsomi.
USbusiso uthenga amabhulugwe amakhulu ukuze enelise ukufaka umlenze wakhe osumkhulu kakhulu.
Uthe umlenze wakhe uyake ulume okokuthi uyazenwaya ngekama kumbe yiloba yini eseduzane njalo kumele ahlale enatha amaphilisi okuthithibalisa ubuhlungu nsuku zonke.
“Omongikazi bathi umkhuhlane engilawo unjengalokhu abakuthi yi-elephantiasis ebangelwa yikungasebenzi kuhle kwezinso kodwa ngemva kokungihlola kanenginengi kwatholakala ukuthi izinso zami azilayo inkinga zisesimeni esihle,” nguSbusiso lo.
“Osiyazi bangitshela indaba ezitshiyeneyo ngobuthakathi kodwa akekho ngitsho loyedwa osowake wanginceda.”
Umkhokheli wenhlanganiso yabosiyazi kweleSouth Africa uSazi Mhlongo, uthe osiyazi abandanga ukwenelisa ukwelapha umkhuhlane onje.
Okhulumela abezempilakahle eKwaZulu Natal uSam Mkhwanazi uthe ugatsha lwabo aluvunyelwa ukukhuluma ngesimo sempilakahle yomuntu ngaphandle kokuba bephiwe imvumo. — Daily Sun
