uMthunywa
Imbongi nguDedani Moyo
Isihloko senkondlo – Mnyaka 2000
KULABO abangakwaziyo umnyaka kathuthawuzeni (2000) waduma kakhulu emhlabeni wonke abantu bekholwa ukuthi wawuzaletha inguquko enkulu emhlabeni njengoba ngizakutshengisa lokhu kunkondlo. Abantu abanengi bakhuluma ngawo ungakafiki waze wafika. Imbongi ize yawubiza lumnyaka ngelithi ngumnyaka weminyaka ngoba abantu babewukhangela njengokuthi wawuzakwehlukana leminye.
Babekhuluma ngawo befanisa lokhu lalokhu. Kakho owaleqiniso lalokho ayekhuluma ngakho ngoba kuthiwa babephikisana ngalokhu bevumelana langokunye. Phakathi kwakho konke lokhu njengoba ngike ngatsho ngaphambilini akula owayelolwazi olugcweleyo ngombono wakhe ngoba imbongi ithi bonke babephumputha.
Ukuphumputha yikudinga ulutho emnyameni ungaboni lokuthi ubambani usiyangaphi. Kunjalo-ke ngalabo ababesithi umnyaka ka2000 uzabanje bengela lwazi olujulileyo ngakho.
Isimanga yikho abanye labo abezokholo babethathekile bethi ngalowo mnyaka indodana kaNkulunkulu, uJesu Kristu, wayesiza okwesibili. Abakhasayo labo ekholweni betshengisa ukusilela kukholo lwabo bethi umhlaba uyacina ngo2000. Abamabhizimuzi labo babemi mazonzo, belokwesaba okukhulu bekhala ngoY2K. Kwakungathi imali zabantu zaziyalobela emabhanga ngenxa yeMileniyamu bhagi leyo.
Kwachithwa izigidi lezigidi zemali kulwiswa yona Mileniyamu bhagi leyo yona eyayizenza zonke izinto zingasebenzi kuhle eziphathelane lemali. Amazwe wonke omhlaba ayesekuthandabuzeni engazi okuyikho ngoba nganxanye ayethi konke kulungile kodwa ahlala eqapheli ecabanga ukuthi kukhona okungenzeka ngomnyaka omehluko okutsho ukuthi otshiyeneyo kuleminye iminyaka eyayisidlule. Iyasivezela imbongi ukuthi basebekhale okwesikhathi eside abantu bemelele wona umnyaka ka2000.
Babewubiza abantu njalo behlabela ngawo bethi kawuze umnyaka ka2000 usasekhatshana kodwa wenela ukusondela eduze baqala ukuthandabuza, bezibuza imibuzo ethile njalo beziphendula kodwa babesala bengasuthisekanga bengazi ukuthi ubaphatheleni lowo mnyaka. Abalengqondo ezimfitshane abaphonguthatheka ngezinto ezikhulunywayo bengela qiniso lazo badla imali angathi bayiqhulula ezihlahleni bethi bafuna ukufa bekholisile.
Yibo labo ababelandela abakhasayo ekholweni ababeqinisa elokuthi umhlaba wawuzatshabala ngo2000. Imbongi ibahleka usulu abanjalo ngokuthi babezidukuza ematsheni ngamakhanda. Babezitshayelela ematsheni ngamakhanda ngoba bengazazi izimiso zenkosi, uNkulunkulu, ngoba kazaziwa layizo izingilosi zezulu. Ukwenza kukaNkunkulu kungaphezu kwakho konke okusemhlabeni. Abangena emoyeni ngamanga, labo abathi bayaboniswa izinto emoyeni, kuthiwa bawahulula amanga beyenga uzulu.
Babewahutshuza amanga-ke labo bethi babonisiwe ukutshabalaliswa komhlaba. Ngokwenzenjalo basebeyonile indaba ngoba labo abayengeka kalula wahle walibona iqiniso kulawomanga. Wazidela uzulu onjalo wavuka ubunyamazana kanti uzazingenela kuY2K njengakuyo yonke iminyaka eyayisithwase yedlula. Uzulu owayemibuzo engapheliyo wayiqeda yonke enjengale:
“Ulungel’ukungena kuY2K?” “Inkampani l’ilunge’ uY2k?” “Umbalisi l’ uY2k?” “Umtshina l’ulungel’ u2000?” Kodwa ngakwelinye icele besithi umhlaba uyacina.
Iyabuza imbongi lamhlanje ithi bangaphi labo ababewaqamba amanga bethi umhlaba uyacina ngo2000 bezenza abalolwazi? Iyabakhuthaza imbongi ukuthi abafunde kusukela lamuhla ukuthi ingwe yingwe ngamabala usuyibona, hatshi ingakaveli ungakaboni lamabala ayo.
