Mbalisi, Balis’ungabalisi: Godfree N C Muyambo

23 Mar, 2017 - 00:03 0 Views

uMthunywa

Silo C Dube kugwalo

SIKUBONILE ngeviki ephelileyo ukuthi umdlalo lo uyaphila ngoba ukhuluma ngezehlakalo ezenzakala ngesikhathi ulotshwa. Uyaphila ngoba abawubalayo lumdlalo bathola izinto abazibonayo labo zisenzakala. Kulokuhambelana kwezinto ngoba sizwa uSipatalala ekhuluma ngokhetho olwaluzakwenzakala ngomnyaka owawuzalandela.

Kulokuhambelana lakhathesi ngoba sikhangelane lokhetho oluzabakhona ngomnyaka ozayo.

USipatalala unika uNdabeni iqhinga lokuthi njengoba kwakuzakuba lokhetho ngomnyaka ozayo kungaba kuhle ukuthi umdlalo wakhe ube lokunye okumayelana lokhetho. Kulwokwesaba kulokho ngoba uMaNaba ulimukisa ukuthi usefuna ukubotshwa uNdabeni nxa esengenisa ezombangazwe kumdlalo wakhe. UMpumelelo kavumelani loMaNaba ngoba uthi akekho ozabotshwa. Uthi yena ubona kulithuba elihle lokuxoxa ngezindlela ukhetho oluqhutshwa ngayo emazweni e-Africa.

Uyaphambili uMpumelelo ethi phela kulokuhambelana emazweni amanengi. Uthi kuhle babelalo lolodaba.

UMaThabo uyekelela kulokho okukhulunywe nguMpumelelo, ethi balakho ukuxoxa ngabafisa ukuba ngabameli edale lephalamende besipha izithembiso zabo kuzulu njalo uthi bengakhohlwa ukuthi abanye bayazifeza kanti njalo abanye babacina mhla bevotelwa.Sizwa ukuthi ukhetho lolu oluzayo luhle ngoba bakhetha abameli babo abane, beqala ngomongameli, kuthi ilunga lesenethi, ilunga lephalamende bacine ngokhansila.

Lokhu kufana xathu lalokho okuzakwenzakala kumnyaka ozayo kwelakithi leZimbabwe. Lokhu kuveza xathu ukuhambelana kwezinto okusetshenziswa yimbongi. Kujayelekile ukuthi abantu nxa bebhekane lokhetho bangahlaliseki. Bayabe bengelaqiniso lokuthi kuzabalokuthula kumbe kuzaba lomsindo. UNdabeni uyabuza kwabanye bakhe ukuthi bona babona njani ngokhetho oluzayo okungaba yimbuzo esebantwini abanengi khathesi.

Uyabuza uNdabeni ukuthi babona angani luzaba lomsindo, ukutshayana lokuhlukuluzana? Ubuya aziphendule athi yena ubona angani amaZimbabwe athuthukile okokuthi bazavota ngokuthula. Lesi yisifiso sabantu abanengi abathuthukileyo abafisa kuvotwe ngokuthula kungeladlakela. USipatala yena uyababonisa ububi ngepolitiki Uqala ngokubuza abanye bakhe ukuthi bayayazi yini ipolitiki? Uqhubekela phambili ebatshela okwenziwa yipolitiki, ethi abantu baphenduka izinyamazana, bathengisane babulalane beyizihlobo.

Uyaphambili ethi e – Afrika akuvamanga ukuba lokuthula ngesikhathi sokhetho. Uthi bazaqedana abantu ngomnyaka ozayo.Ukhetho lomnyaka ozayo eZimbabwe lwandulelwa ngolweKenya, ngokufanayo lalonyaka ukhetho lweKenya lwandulela olweZimbabwe. Njengokutsho kukaSipatalala  ukuthi abeKenya njengoba bekhetha umongameli asazi ukuthi bona bazaqhuba njani. UNdabeni uletha umcijo omuhle ngokuthi kumele bafakeni emdlalweni wabo mayelana lezokhetho.

UNdabeni uthi kumele bakhiphe umoya wokuxolelana lokubekezelelana lanxa abantu besekela amabandla atshiyeneyo. Lokhu uthi ukubona kuyisiqokoqela, ukuphilisana lanxa abantu belembono etshiyeneyo. Uqhubekela phambili ethi njalo kumele baveze ukuhlonitshwa kwempumela yokhetho. Uthi le yiyo indlela engenza  iAfrika ihlonitshwe. Umdlalo lo kusobala ukuthi ujonge ukufundisa abantu izinto ezinengi ezinjengo kukhuthaza ukuthi basebenze nxa bephiwe umsebenze kunye lenhlakahle kazulu.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds