uMthunywa
Silo Ophezulu Stinta kugwalo
NGEVIKI edlulileyo sitshiye umaMsie sevukelwa njalo yisibungu sakhe sokudingana lo Joza. Ngakolunye uhlangothi ngale uJoza emhleka usulu embona ubuphukuphuku.Wayesefisa ukungcothuka kulo umjibila ayesezifake kuwo uJoza kodwa ke elohlupho lokuthi isinama esingu maMsie sasimnamathele ngendlela enzima.
Kwathi kengosuku ayelubeke encwadini ayeyibhalele uJoza wavuka wacabanga iqhinga lokuvala uNgonyama amehlo, wazibika ukuthi wayefuna nje ukuvakatshela edolobheni njengomuntu owayeselensuku ehlezi lapha endlini.
Ngobuwula bakhe umaMsie wayezibona ehlakaniphe okungale engazi nje ukuthi uNgonyama wayemkhangele ngelihlo lokhozi.
Wageza wabalicitsha langa engasahlalwa mpukane. Engadlalisanga isikhathi waqonda khona lapho ayethe bazahlangana khona loJoza. Wayengafuni lomuntu ngitsho owayemkhulumisa kambe ezilindele umuntu oqakathekileyo kuye ngokubona kwakhe.Walinda walinda imizuzu yatshova yaba ngamahola kungela Joza ofukayo.
Izikhathi zasezisiya ngomtsha wendoda lapho abona khona ukuthi ayikho linkukhu, walahlisa ngokuthenga amafutha obuso sengathi yiwo ayewaphumele ijumo imini yonke.Wayesegane unwabu ngalelonga umaMsie wambiza ngawo amagama anzima uJoza wakhe wamfisela konke okubi ayekucabanga ngaleso sikhathi.
Ngelanga elilandelayo wabuya wayihlalela njalo enye incwadi eyibhekise khona kuJoza lowo. Leyo ke eyesibili wabona kungcono khona ukuthi azihambisele yena mathupha njengoba wayefuna isiqiniseko sokuthi abone ngempela ukuthi incwadi yakhe ihambile.
Wakubona kufanele ukuthi ambone nxa engekho amlinde azafike.Kubanzima kulo umlingiswa ongumaMsie nxa ebuswa yimizwa yothando ngendlela efana lale, ulaye umkakhe omthanda okwamagama ngesikhathi kufanele alungise indaba zomuzi wakhe azame ukuvuselela umlilo ayesewucitshe ngezakhe ubuya aphambane futhi aduhe lelizwe. Siyananzelela ke inkulumo emqotho lapha ethi yona uzigwaze ngowakhe. Kambe uthunywa ngubani umaMsie ukuthi enze konke lokhu aphezu kwakho kacabangi na ngezilandela muva zezenzo zakhe.
UJoza wathi esizwa ukuthi wayedingwa njalo edingwa ngumuntu onjani wahle wayifunda ivaliwe lelo langa.
Wathi kulo mathunywa kayemazisa UmaMsie ukuthi wayesephumile. Laye UmaMsie wayengathi uyasola ukuthi kanti bekuthiwe ukhona sekukuguquka njalo kwakuhambe njani, kodwa ke kuyini ayengakwenza wayengeke aziphosele phakathi kwentuba kungelamvumo.Watshiya ke incwadi yakhe ngethemba lokuthi yayizamfikisela amazwi akhe.
