Ungena kuvungame umphakathi uMbonisi Mnkandla

23 Mar, 2017 - 00:03 0 Views
Ungena kuvungame umphakathi uMbonisi Mnkandla UMbonisi Mnkandla

uMthunywa

BAKAMALANDELA iphephandaba likazulu njengoba lisaziwa ngendaba ezimnandi nanko njalo kule iviki lize lazo.

Angithi nje liye layafukula ijaha elidala elicula kunyikinyeke phansi. Kaliculi nje lelijaha liyabulala.

Kambe kungaba ngubani otshaya kamnandi kangaka ngaphandle kukaMbonisi Mnkandla ingudlameva edabuka eLupane. Othanda ukujabula kule iviki nansi ingxoxo enambithekayo phakathi komculi wodumo uMbonisi Mnkandla (MN) lentatheli yephephandaba likazulu uCornelius Luphahla (CL).

CL: Akutsho jahalakithi ngamafitshane mayelana lembali yakho kanye leyomculo wakho?

MN: Mina ngazalelwa esigabeni seDongamuzi eLupane okuyikho engakhulela khona. Izifundo zami ngaziqalisela eDongamuzi Primary ngayaqedisa Ekuphakameni Secondary School.

Ezokucula ngaziqalisa ngesikhathi ngisasemncane ngoba ukhulu wami wayehlabela umculo ka-maskandi noma nje engazange wakhipha idlalade. Ngasuka njalo ngahlabela leqembu le-rhumba elithiwa yiSgudlamawa. Kuthe ngo2013 ngasungula elami iqembu likamaskandi ngalibiza ngegama lami.

CL: Lokhe waqala ezokucula sowakhipha amadlalade amangaki jahelibanzi?

MN: Njengomculi kamaskandi sengakhipha amadlalade amabili elakuqala ngalikhipha ngomnyaka ka2014 elithi Ngikhethelwe Nguye. Lelidlalade ngalipha isihloko lesi ngoba ngangisithi uNkulunkulu nguye ongikhethele intombi engilayo. Ngabuya njalo ngakhipha elinye idlalade ngo2015 elithi Sminofi. Lapha ngangixwayisa abantu ukuthi bangaqakathekisi kakhulu ukunatha utshwala kodwa kabakhangelele ikusasa labo.

CL: Uvame ukutshayela ngaphi ingoma zakho mfoka Mnkandla?

MN: Ingoma zami ngivame ukuzidlalela kuma-shows atshiyeneyo kwele South Africa kanye lemikhosini efana lemitshado lamadili okuzalwa. Ngalokhu ngikhululekile ukuthi ungangibiza noma ngaphi ngizojabulisa uzulu ngengoma.

CL: Abantu bathini jahalakithi ngomculo wakho njalo ukhangelele ukubenzelani lonyaka?

MN: Abantu bayawujabulela kakhulu umculo wami njalo bangikhuthaza ukuthi ngiqhubekele phambili ngibajabulisa ngengoma. Ngalokhu lonyaka ngikhangelele ukubakhiphela elinye njalo idlalade elitsthisayo ngenhloso yokujabulisa uzulu.

Okunye njalo ngizavakatshela abalandeli bami endaweni ezehlukeneyo ngibadlalela ingoma zami.

CL: Bunzima bani osuke wahlangana labo kwezomculo njalo nkuthazo bani oyipha abaculi abasasungula?

MN: Ubunzima engiyake ngihlangane labo kwezomculo yikuswela imali yokuzithuthukisa kwezomculo kanye lokuthi kulabantu abantshontsha umculo wami bawuthengise ngentengo ephansi kuthi nxa sengiwuthengisa abantu bengasawuthengi kuhle.

Kubaculi abasasungula ngithi kabaqhubekele phambili ngomsebenzi wabo noma kunzima. Okunye njalo ngibakhuthaza ukuthi bacule ngenhlonipho njalo bakhe uzulu ngomculo wabo.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds