uMthunywa
Cornelius Luphahla
KUYABE kungabizwa ozwayo eBerea Park eSouth Africa mhlaka 1 Mabasa kusukela ekuseni kuze kuyelamula ukusa lapho uMxolisi “Mr Bones” Ndlovu umculi we-rhumba azabe ekhupha ividiyo yakhe yomhlaba entsha.
Umkhosi lo ozahlabekisa uzulu ngoba kusethulwa ividiyo yakhe entsha.
Kubikwa ividiyo kaMr Bones le entsha ilengoma eziyisithupha njalo ku-albhamu le ukhuthaza uzulu ukuziphatha.
“Ividiyo yami le esengiyipheke yavuthwa ilesihloko esithi Ezehumutsha njalo ilengoma eziyisithupha. Ingoma lezi ngezisemadlaladeni ami amabili, ethi Uyinkinga umakhwapheni lethi Dilika Jele. Ngalokhu ngikhuthaza uzulu ukuthi aphatheke emkhosini lo ukuze azozibonela engibaphathele khona,” kutsho uMxolisi Ndlovu.
UNdlovu uqhubekele phambili esithi ubonga usekelo lwabalandeli kanye lalabo abamncedise ukukhipha ividiyo le.
Uthe uzavakatshela emazweni atshiyeneyo ezwisa abalandeli umculo wakhe.
“Ngiyabonga kakhulu abalandeli bami ngokungisekela ngibuye njalo ngibonge inkampani yeSPB Digital ngokungincedisa kwayo ukukhipha ividiyo yami. Okunye njalo mhlaka 2 Mabasa ngizayajabulisa uzulu ngisakaza ividiyo yami e-Empire Park.
“Enyangeni ezizayo ngizavakatshela kweleBotswana ngiyezwisa abalandeli bami idlalade lami ngibuye njalo ngiye kwelakithi koMthwakazi ngiyebajabulisa ngengoma zami,” kuphetha uNdlovu.
