uMthunywa
Ncekwenhle Ncube
ABABONA ngezokulima kanye lokufuya abeLivestock Production Development bakhuthaza abalimi ukuthi baqalise ukusikela izifuyo zabo utshani kungakafiki isikhathi sobusika.
Inkuthazo le iza kulandela ukutsha kakhulu kotshani ngomnyaka odluleyo okwenze abalimi abanengi bafelwa yizifuyo ngenxa yendlala.
UMnumzana Mthulisi Ngwenya ongumlimisi phansi kweAgritex ukhuthaze abalimi ukuthi basebenzise ithuba leli utshani bubunengi ukuthi basike abazabunika izifuyo sekomile.
“Kulithuba elihle leli elimele lisetshenziswe ngabalimi ukusika utshani. Izulu libe linengi lonyaka okwenze utshani bakhula bababunengi. Labo abelesifiso sokuthengisa izifuyo zabo zinonile kumele basike utshani babugcine ukuze kuthi nxa sekufika isikhathi sobusika baziphe ukuze ziqhubeke zinonile zithengiseke ngemali ephezulu.
“Indlela le yokugcina ukudla ilula njalo kayidingi mali enengi. Kumele babone ukuthi lapho abazagcina utshani lobu abudliwa ngumuhlwa,” kutsho uMnu Ngwenya.
Uthe utshani lobu kumele babufake phakathi kwamabhele ezingalaneni njalo kumele babuvale ngamaphepha amnyama ukuze bungalahlekelwa yikudla ngenxa yokutshisa kwelanga.
Abalimi bakhuthazwa njalo ukuthi bangatshisi iganga ngoba kungokunye okudala ukuthi izifuyo ziswele ukudla ngoba utshani sebutshile.
Umlimisi uMnumzana Mthobi Ndiweni uthe abalimi nxa bevula amafireguard utshani obuphuma lapho bebugcine phakathi kwamabhele babusebenzise ngesikhathi sendlala.
“Isikhathi sendlala sizafika. Kungakho sithanda ukuba sikhuthaze abalimi ukuthi utshani obuphuma nxa besenza ama-fireguard babugcine ukuze babusebenzise ngesikhathi sendlala. Abantu balomkhuba wokuthatha utshani kanye lamahlanga babufake ezibayeni ukuze enze umquba. Kodwa-ke sikhuthaza ukuthi bangawafaki balinde izulu liqale line njalo sekulokudla.
