uMthunywa
YiNtatheli kaMthunywa
INKUNZI zomdlalo wenguqu iHighlanders leCaps United zithembisa ukudla kwamehlo mhla zidibana kunkezo yeZNA Charities enkundleni yeBarbourfields ngoMgqibelo.
Akusoze kubelula kulumdlalo ozakhupha ubungcitshi obuphekwe ngamaqembu la elungiselela ukuvulwa kwesizini ka2017.
Kuzindaba ezimnandi ukuthi umdlalo lo useBarbourfields ngoba kade abathandi benguqu bacina ukubekela umdlalo omkhulu njengalo koBulawayo.
IHighlanders ingena kulumdlalo iyintshantshu yesizini edluleyo okuyikhona okuyinikeza umfutho wokuthi idlalele ukunqoba. ICaps United imise imisila phezulu kulandela ukuqhubekela phambili kuhlandla lomkhankaso wenkezo yeCaf Champions League. Ithimu le yingqwele yenguqu yePSL ka2016.
Imbali ephethwe ngamaqembu la yiyo ezakwenza umdlalo we-final yeZNA uhlabuse.
Kusukela ngesizini ka2014, amaqembu la edlala eBarbourfields, iHighlanders isinqobe kanengi loba nje kukhanya ukuthi iCaps United ibibusa kumidlalo yeligi.
Kumdlalo lo kuqalwa phansi ngoba kulisizini kulabadlali abatsha kumaqembu la njalo labaqeqetshi babika ukuthi sebeyinuka inkezo yamabutho.
Abaqoqi benkezo le bathembisa ukuthi ababukeli bomdlalo bazakholisa ukudla kwamehlo. Ekhuluma loMthunywa uLieutenant Colonel Joe Chitungo uthe umdlalo usungoMgqibelo loba nje ubuhlelelwe ngeSonto njalo konke sekulungisiwe ukuthi amaqembu adibane eMagumeni.
“Kuzakuba nguMgqibelo obomvu eBarbourfields ku-final yeZNA Charities. Kubo bonke abathanda amaqembu la. Umdlalo sikhethe ukuthi udlalwe ngoMgqibelo ngoba inhlanganiso yeZifa isitshele ukuthi senze njalo. Isizatho yikuthi ngeSonto kulomdlalo wobungane phakathi kweZimbabwe leZambia eHarare. Sizahlangana eBarbourfields kuhlandla lalonyaka olenkezo yeZNA Charities,” kutsho uLt Chitungo.
Inkezo le izakuba ngeyakuqala andubana kuvulwe iligi yePSL ngoMabasa.
ULt Col Chitungo wazise ukuba injongo yalinkezo ngeyokuncedisa inhlelo zamabutho kuleli kanye lokuphakamisa umdlalo wenguqu.
Imali ezanqotshwa lapha izaphathisa ukuthenga abadlali abasafunwa ngamaqembu womabili kulisizini, kungakafiki ilanga lokuvalwa kwemakethe.
Iphephandaba likazulu livakatshele iHighlanders ngesikhathi ilolonga kwenye inkundla koBulawayo ngoLwesibili.
Umqeqetshi walo uErol Akbay uthe ulinde ukuyithwala njalo inkezo le okwaba ngeyokuqala ukuthwala engumqeqetshi weTshilamoya.
“Njengeqembu eliphethe inkezo le, kumele sibambe ngamandla kulumdlalo. ICaps United siyayihlonipha kodwa asivumi ukuthi isithathele inkezo le lapha eBarbourfields, yikho okwaziwa ngabadlali,” kutsho uAkbay, owaziwa ngelithi “uMkabayi” kubalandeli beqembu.
Abafana abaluhlaza, iCaps United bathemba ukuthi baphambili ngokudlala njengoba besanda kwenza izimanga kumkhankaso weCaf.
ULloyd Chitembwe umqeqetshi wentshantshu lezi uzizwa engethuki lutho.
“Umdlalo lo ufana layo yonke. Lokho esikwenze kuCaf Champions League sikufaka khatshana.”
