uMthunywa
ABASESABI ukutshontshelwa impahla abazi isangoma esidume ngotholela abatshontshelwe impahla yabo kugoqela izimota omabonakude kanye lamafoni ngoba isangoma lesi simane sikulethe lokhu khonapho khonapho.
UMnumzana Mandla Mngqwazi oyisangoma esikhulu eFochville entshonalanga yeGauteng kweleSouth Africa kubikwa umangalise abantu ngokuphendukisa imota yesinye isakhamuzi akade itshontshiwe.
UMngqwazi kubikwa sowasiza abanengi ngokubalondela imota zabo ezitshontshiweyo azithole.
UMngqwazi uchaze ukuba usesize abanengi ukulonda lokuthola impahla zabo eziligugu ezigoqela indandatho kanye lezimota.
Ubike ukuthi isiphiwo sakhe lesi sivela kwabaphansi.
Abantu abasuka kule indawo bavumile ukuthi uMandla uyabasiza ngempela abantu.
UJohannes Kololo (56) oseke wathola usizo kuMngqwazi uthe isela eligangileyo lamqila lamtshontsha iFord Courier yakhe ngoNhlolanja nyakenye.
“Kulendoda eyangiqilayo yathatha imota yami yohlobo lwebakkie ngesikhathi ngiseJoburg.
“Wasuka ethi uyafundela ukutshayela kazange aphenduke layo” kutsho uKololo.
Uthe ngemva kokuzwa ngobuciko bukaMngqwazi wahle waya kuye ukuze laye athole usizo.
“Ngamangala ngendlela asebenza ngayo lumuntu ngoba ngesikhathi esifitshane nje imota yami yayisitholakele.
Kazange achithe isikhathi kumbe ukwenza imithanithani engapheliyo wamane wayibiza imota yami yahle yatholakala,” kutsho uKololo.
UEster uNkosikazi kaJohannes uthe lulunya olukhulu abalwenziwayo olokutshontshelwa imota yabo edula kakhulu.
Uthe noma kunjalo kulungile ngoba sebezayithola njalo.
ULehlonolo Tlali (52) uthe iNissan Bantam yakhe wayithathelwa ngamasela bemthembisa ukumdubula eCarletonville mhlaka 25 kuZibandlela.
“Kwathi kumhlaka 22 Nhlolanja ngahamba kuMngqwazi onguye owanginceda ukuthi ngithole imota yami eFochville. Ngajabula kakhulu ngoba ngangile tracking system emoteni yami kodwa kayizange yangisiza ngalutho ekuthini ngiyithole. Ngalokhu ngiyambonga kakhulu uMngqwazi ngokuyiveza,” kutsho uLihlonolo.
UMngqwazi uthe kwesinye isikhathi uyaphuza ukubona imota kodwa uyayithola kuphela.Uthe abantu kumele bekele ukutshontshela abanye ngoba ngelinye ilanga omunye uzamthumela inyoka.
“Mina kwesinye isikhathi ngiyathatha amalanga angu-30 ukhuthi ngibone imota etshontshiweyo kodwa ngivame ukuthatha iviki kuphela. Ngalokhu ngixwayisa abantu ukuthi bame ukutshontsha impahla zabanye ngoba kwelinye ilanga omunye ngizamthumela inyoka ephaphayo imlume,” kuphetha uMandla. — Ubulembu
