uMthunywa
Isihloko senkondlo — Amakhosikazi obusuku
SITSHENGISWA abantu abakhohlakeleyo abaphambene lendalo kaNkulunkulu. Laba ngomama asebelahle Ubuntu babo baziphilisa okwenyamazana. Imbongi iyasitshengisa, ibakhomba ngenkomba isitshela ukuthi ngabantu abalahlekileyo, abalahla ubuntu babo okutsho ukuthi sebalahla imbeko kumbe ukuziphatha kuhle. Sebelahle imikhuba lamasiko akwabo baziphatha okwenyamazana zona ezingela masiko.
Omama laba imbongi ekhuluma ngabo ithi sebephenduke izigebengu. Isimanga yikuthi kazihlomanga lezizigengu kodwa zibulala ukwedlula izigebengu ezihlome ngokupheleleyo, ezihlome ngenkemba yona esika nxazombili.
Iyakhala imbongi ihlaba umkhosi ngokufa osekuqeda isizwe. Iyachaza lamanina imbongi ukuthi ngamanina akhangayo, abutshelezi okungathi ahlala ekhothwa zinyoka zakwawo.
Imbongi iyavumelana lalowo owatsho lesi saga esilandelayo: “Akugeza lingelasiyinga.” Lo owakhuluma la amazwi wayesitsho ukuthi umuntu angaze abemuhle njani kukhona okubi ngaye. Siyabona lapha omama laba bangamakhosikazi abukwa ngabantu abaphiwa ubuhle njalo bayakwazi ukuzigezisa ukuze bahlale bebukeka bakhange isilisa. Ukhona laye owasekela lesi saga ngesinye esilengcazelo efanayo owathi, “Ikhiwane elihle ligcwel’izibungu.”
Njengoba sengitshilo ngaphambili lesi sitsho laso ukuthi umuntu engaze abemuhle njani kukhona okusolekayo ngaye. Nanka amanina la mahle okwamagama kodwa bahamba ebusuku. Iyatsho imbongi ukuthi mahle wonke lamanina kodwa izenzo zawo. Akhanya egqokile kodwa imbongi ithi kufana lokuthi kawagqokanga, “Agqoka kumlungu kawagqokanga: Lokhu kutsho ukuba bagqoka izigqoko ezikhanyiselayo ngoba nanku kuthiwa baveza amathangazi bethiya kumbe behuga isilisa.Abesilisa abahugwa ngalindlela kuthiwa ngabalenhliziyo ezilengayo ngoba vele kulesaga njalo esithi zithiywa ngezikudlayo. Nxa ufuna ukubamba inyoni uzithiya ngalokho ezikudlayo.
Lesilisa laso leso esilenhliziyo ezilengayo amakhosikazi ebusuku abathiya ngokubavezela amathangazi abutshelezi.Ngokuthatheka kalula kanje bazafa lunyanya. Lokhu kutsho ukuthi bazakufa ngobunengi abeselisa ngokwehluleka ukubamba inhliziyo zabo ezilengayo.
Amanina la athanda ukutshotshola ngobusuku izimota zaziwa yiwo. Amanina la athanda ukugada izimota zabesilisa sona esibasa kundawo ezitshiyeneyo ngoba imbongi ithi amawotela angenwa yilamanina. Akaziphathanga lamanina ngoba alala avuke kumibheda etshiyeneyo. Lokhu kuveza sobala ukuthi balala labesilisa abahlukeneyo. Lokhu kufakazwa yila amazwi:
“Alala kul’umbheda Avuke kulowa. Lamhla abiz’uDube baba Kusasa azabiz’uMoyo baba Ngomhlomuny abiz’ omunye.”
Imbongi iphetha lesisigaba ngokuhlaba umkhosi ibiza lamanina ngokuthi bahlanyela umkhuhlane. Umkhuhlane lo ohlanyelwayo kungaba ngumqedazwe, i-Aids ngoba amanina la alala labesilisa abatshiyeneyo. “Maye!
Mahlanyel’umkhuhlane.” Amanina aqotho, aqondileyo bathola ukudla ngokuzisebenzela, adla ngezithukuthuku.
Lamanina angazi-phathanga kuthiwa adla ngokugeza, adla ngobuhle obadlaliswayo. Ukugeza abemahle, ubuhle babo bubesegcekeni, lamanina asebusebenzisa kubi ngoba kubenza bahuge abesilisa abanengi. Mahle lamakhosikazi kodwa imbongi ithi yibuhle obadlaliswayo ngoba busetshenziswa kubi. Amanina la adla ngokuthengisa imizimba yabo kwabesilisa njalo adla ngokudiyazela behamba benqunu ezitaladeni. “Adla ngokudiyazela Ebhunyu-muny’ezitaladeni.”
