uMthunywa
Silo Ophezulu Stinta
KULE iviki sizaxoxa ngesifuyo esiqakathekileyo empilweni yabantu, isifuyo esiqathekiswa ngabalimi njalo. Inkomo yisifuyo esingaxoxa ngaso sikhangele inhlangothi ezinengi kakhulu. inkomo ingahlinzwa inyama yakhona ilamagama atshiyeneyo, zimele laphana izitho zayo zilamagama atshiyeneyo. Ukudalwa kwayo lokuma kwayo njalo kulamagama atshiyeneyo.
Nanku ke okunye esingakuphawula ngenkomo zethu.
1. Inkomo enduna engathenwanga yinkuzi, etheniweyo yinkabi engathenwanga linxaha.
2. Ithole eselilidala liguqa
3. Inkonyane ezelwe ifile ngumphunzo
4. Nxa inkomokazi emithiyo isiba lobunzima ekuzaleni kuthiwa ixakele
Nxa umuntu eseyincedisa ukuthi liphume inkonyane ngokungenisa isandla esithweni sayo ehwatsha inkonyane kuthiwa iyakhokhelwa
5. Inkomo esanda kuzala yindlezane njalo uchago lwayo ngumthubi/yisathubi
6. Inkomo esanda kuzalwa linkonyane kanti ingakhula khula iba lithole.
7. Inkomokazi eyehlisayo ngunondlini. Engehlisiyo yisigqala
8. Inkomokazi ezeleyo iwisa into esanyama ende ethiwa yingqatshi
9. Inkomo endala kuleguqa ingesikazi lithokazi. Nxa ingenduna etheniweyo lijongosi.
10. Nxa inkomokazi isilungele inkuzi kuthiwa isidabule. Uma inkunzi isiyilandela iyabe isixotshwa kumbe ikhwelwa.
