uMthunywa
Ncekwenhle Ncube
INHLANGANISO ebona ngezokulima iAgritex isixwayise abalimi ukuthi bananzelele amagenga ngoba eyingozi ezilinyweni zabo njalo alakho ukwehlisa isilinganiso sesivuno salonyanka.
Kubikwa endaweni ezinengi lapho okulesibomvu khona abalimi abanengi bande ukuhlangana lohlupho lwamagenga kuyikho nje abalimisi befisa ukulimukisa abalimi ngalokhu.
Lokhu kuza kulandela ukuthi umsekeli kaMongameli uKhomuredi Emmerson Mnangagwa evakatshele eAntelope Estate eMaphisa kuviki edluleyo lapho achaze ukuthi isivuno salonyaka siphezulu.
UMnumzana Mthobi Ndiweni ongumlimisi ngaphansi kweAgritex Esigodini, uthe abalimi kumele bahlole emasimini abo malanga onke ngoba belakho ukuthola izilimo zabo sezihlaselwe ngumuhlwa.
“Abalimi abaqaphele ngoba lesi yiso isikhathi lapho abalahlekelwa khona yikudla obekumele kungene esiphaleni.
“Kulamangenga ande ukuba sezindaweni ezilesibomvu adla iziqu zomumbu omanzi kanye loluhlaza. Aqansa ngohlanga lomumbu aze ayebamba isiqu ngokwaso abesesidla inhlamvu zomumbu.
“Ku labo asebenze amazala emasimini kabahlole ukuze babe leqiniso lokuthi umumbu wabo awuhlaselwa ngumuhlwa,” kuchaza uMnu Ndiweni
Uqhubekele phambili esithi abalimi ikakhulu abasendaweni zemakhaya balakho ukusebenzisa igwayi ukuxotsha umuhlwa ezilinyweni zabo.
Uthe igwayi ugwini liyahazwa emasimini lapho osekuqala khona ukuhlaselwa ngumuhlwa kodwa kwande ukubalula nxa kusesizeni lapho osekubuthelelwe khona isivuno.
Ubuye njalo wakhuthaza abalimi ukuthi bakhulise ubudlelwano labalimisi bendawo zakibo ngoba beyibo abakwazi ngcono imithi efaneleyo yokulwisana lenhlupho abahlangana lazo mihla yonke.
UMnu Ndiweni uphinde njalo wakhuthaza abalimi ukuthi basebenzise umlotha ukugqagqela ingalane zabo ukuze umuhlwa ungangeni. Ukhuthaze lokuthi bathenge umuthi wokuvikela impehlane.
