uMthunywa
Thokozile Mbedzi
ABALIMI esabelweni seMatabeleland South bakhuthazwa ukuthi bahlabise izifuyo zabo ukuze kwenqatshelwe umkhuhlane womkhono ngoba izulu lonyaka libe linengi.
UDokotela wezifuyo eVeterenary Services esabelweni lesi, uDkt Mthulisi Ngwenya uthe sebeqalisile ukuhlaba inkomo ukuze bazivikele kumkhuhlane womkhono lanxa behlutshwa yikugcwala kwezifuyo.
UDkt Ngwenya uthe ukudla kwezifuyo kunengi sibili njalo lazo izifuyo zinhle okokuthi abalimi lanxa bezithengisa ziyakhanga abathengi kodwa akumelanga abalimi bakhangele izifuyo kuphela kumele bazivikele ukuze izifuyo zabo zingahlaselwa ngumkhuhlane womkhono oyingozi ngalesi isikhathi.
“Abalimi khathesi kumele bahlabe izifuyo zabo ngoba khathesi yisikhathi sokuvikela umkhuhlane womkhono.
“Sesiqalisile ukuhlaba imihlambi emilutshwana nje kodwa uhlupho yikuthi izifula zisagcwele ngakho ingentsha sizaqhubekela phambili njalo sihlaba izifuyo.
“Sihlose ukuthi kungabi lomlimi olahlekelwa zinkomo zakhe ngoba khathesi yisikhathi umkhuhlane lo ohlasela kakhulu izifuyo.
“Labalimi abazihlabela izifuyo zabo labo yisikhathi sokuthi baqale ukuhlaba izifuyo zabo nxa belalokho abafuna ukukuzwisisa bakhululekile ukuthi bafike emawofisini ethu sizobancedisa,” kuchasisa uDkt Ngwenya.
