uMthunywa
ABALANDELI benguqu kuleli sebekhuthazwe ukuthi nxa befuna ukwazi iqiniso abalandele imbiko ephuma kumaphephandaba hatshi ukubala ibumba eligcwele kuWhatsApp, kucebisa inhlanganiso yePremier Soccer League kulandela amanga okuthi sekukhitshwe uluhlu lwemidlalo ka2017 lokuthi lonyaka amaqembu azadlalela amahala.
IPSL ibika ukuba ikhathazekile ngokumemetheka kwembiko ethi uluhlu lwemidlalo yeligi ka2017 isiphumile. Ngeviki edluleyo abalandeli labathandi bomdlalo banathisane itiye ngamanga wokuthi iPSL iyehlulekile ukuthola inkampani engasekela iligi ka2017.
Kubikwa iqiniso ngalokhu lizakhulunywa ngemva komhlangano omkhulu wangoMgqibelo. Umhlangangano lo unxusa wonke amaqembu adlala kuligi le njalo kumele ubelempumela enhle mayelana ngosekelo lwemali ezancedisa ukuqhuba imidlalo kumasizini alandelayo.
Umbuzo okhona kubalandeli lamaqembu yikuthi uzaphuma lezithelo yini umhlangano lo? Kulindeleke ukuthi unike impendulo ikakhulu kudaba lwemali yosekelo.
Inhlanganiso ephethe imidlalo le ithe inkulumo phakathi kwayo leCastle Lager iyaqhubeka, kusahlanganiswa imbono ngendlela okungangezelelwa ngayo isivumelwano sosekelo.
Ngemzamo yokudinga iqiniso ngalokhu, uMthunywa utshayele isikhulumi sePSL ucingo esibike ukuthi uluhlu lweqiniso luzakhitshwa ngemva komhlangano wamaqembu wonke awePSL mhlaka 18 kulinyanga.
“Konke okubalwa kuWhatApp mayelana ngePSL kumanga aluhlaza tshoko. Inhlanganiso yePSL ithanda ukwazisa amaqembu labalandeli ukuthi imbiko yimidlalo ithunyelwa ngendlela ezaziwayo hatshi iWhatsApp. Uluhlu lweqiniso ngemidlalo ka2017 luzaphuma ngemva komhlangano ngempelaviki.
“Sikhuthaza abalandeli beligi yethu ukuthi bangazihluphi ngama-fixture la agcwele kuWhatsApp. Inhlanganiso yePSL ayisebenzisi iWhatsApp ukuthumela imbiko,” ngamazwi kaKudzai Bare isikhulumi sePSL.
Kusenjalo, iPSL ivula isizini ka2017 ngestayila nanko phela ifikisa iminyaka engamatshumi amabili lanhlanu iqhuba umdlalo kuleli.
